Á dögunum kom út bókin Íslensk samtímahönnun - húsgögn, vöruhönnun og arkitektúr eftir Elísabetu V. Ingvarsdóttur. Bókin er gefin út í tengslum við sýninguna Íslensk hönnun 2009 sem fyrst var sett upp á Listahátíð í Reykjavík 2009 á Kjarvalsstöðum. Heiðurinn af grafískri hönnun bókarinnar og grafík sýningarinnar á hönnuðurinn Hörður Lárusson.  

Hörður nam grafíska hönnun við Listaháskóla Íslands og við The Third Basel Basics in Design and Typography. Hann hefur starfað sjálfstætt allt frá árinu 2000 en hóf störf á vinnustofu Atla Hilmarssonar árið 2005. Samhliða starfi hefur Hörður kennt námskeið við Listaháskóla Íslands auk þess að sinna formennsku Félags íslenskra teiknara.    

Verkefnalistinn á vefsíðu Harðar er langur og verkefnamappan sýnir verk unnin fyrir fjölmarga  innlenda sem erlenda aðila. Auk þess hefur Hörður tekið þátt í sýningum og verk eftir hann hafa birtst í alþjóðlegum fagtímaritum og bókum. Hörður hefur hlotið fjölmörg verðlaun og viðurkenningar fyrir störf sín og nú síðast FÍT–Verðlaunin 2009 í flokkinum Grafísk Hönnun fyrir Prentmiðla, fyrir bókina Fáninn. 

Hörður Lárusson situr fyrir svörum hjá Hönnunarmiðstöð:

Drifkrafturinn?
Drifkrafturinn fyrir mig liggur nánast alfarið í hvort ég hef áhuga og gaman af verkefninu. Þó að maður geri vissulega ekki bara stórskemmtileg verkefni, þá lifir áhuginn á faginu góðu lífi á þessum skemmtilegu verkefnum.

Ferlið?
Fyrir mér er mikilvægasti hlutinn af ferlinu byrjunin, þegar maður er ennþá að hitta kúnann og rannsaka verkefnið. Munurinn á hversu vel verkefni tekst hjá mér liggur yfirleitt í hversu mikinn tíma ég fæ í undirbúning. Ef ég fæ að stjórna ferlinu alveg eins og ég vil, þá er lang skemmtilegast á byrja á að kynna sér verkefnið / kúnnann almennilega fyrst. Fá að koma í heimsókn og sjá hvað og hvernig hlutirnir eru gerðir. Síðan hefur það alltaf reynst mér best að fá nokkra daga í að hugsa ekki um verkefnið og gera eitthvað annað. Yfirleitt koma þá hugmyndirnar sem duga til að byrja verkefnið. Eftir það er þetta bara hefðbundið. Klárar nokkrar skissur. Sýnir þær. Breytir þeim. Skoðar þær. Lagar þær. Fílar þær. Neyðist til að breyta þeim. Fílar þær minna. Smá breytingar í viðbót. Og endar vonandi á að vera hamingjusamur með útkomuna. Þetta er reyndar ekki alltaf hægt, þannig að það eina sem passa að gera alltaf er að vera duglegur að fá álit hjá góðu fólki í gegnum ferlið. Útkoman er alltaf betri þegar maður fær aðra til að hjálpa sér.

Sýnin?
Mín persónulega sýn á grafíska hönnun og hönnun yfir höfuð er í raun mjög einföld. Varðandi mína vinnu, þá lít ég á það sem ég geri sem nokkurnskonar lausnir á vandamálum, eða á mjög praktískan hátt. Fyrir mér skiptir öllu máli að huturinn sem er verið að hanna geri það sem hann á að gera. Vissulega á hann að vera fallegur, en það situr í öðru sæti við það að ná að koma tilgangi hlutsins fram. Þetta á í raun við um hvaða hönnun sem er. Ef þú ert með lyklakippu sem er fallegasta lyklakippa sem hefur verið búin til, en gerir það að verkum að lyklarnir leggjast kannski illa saman og er alltaf vandamál að hafa í vasanum, þá er þetta illa hönnuð lyklakippa. Hlutir geta þó líka verið hannaðir eingöngu með það í huga að vera fallegir, en þá er líka tilgangi þeirra náð. Þetta má vera mjög einföld sýn á fagið, og án efa ekki sýn sem allir eru mér sammála um. Og ég er langt því frá að reyna að telja öðrum trú um að sjá hlutina eins og ég sé þá, því ég held að það sé mismunandi sýn okkar sem gerir okkur að mismunandi hönnuðum.

Skiptir hönnun máli?
Að sjálfsögðu. En ég held að ekki sé hollt fyrir okkur að rökræða of mikið og rífast við að reyna að útskýra fyrir fólki sem er ósammála af hverju hún skiptir máli. Við eigum að nota orkuna okkar í að sýna af hverju hún skiptir máli.

Hvað gerir eitthvað að góðri hönnun?
Að mestu leit held ég að ég hafi svarað þessu í sýn minni á fagið. En það má kannski bæta því við að erum öll ólík og það hefur stórkostleg áhrif á hvað er góð hönnun og hvað ekki. Þá meina ég að hlutur sem er góð hönnun fyrir mér gæti verið hroðaleg hönnun fyrir þér. Í besta falli gætu flestir sameinast um tiltekna hluti sem þættu vera vond hönnun. En að fá alla til að sameinast um hvað er góð hönnun, hvað þá sú besta, er ómögulegt. Sem betur fer, bæði fyrir fjölbreytnina og fyrir allar bókaútgáfurnar um allan heim sem stórgræða á að búa til bækur með "bestu hönnun í heimi". Það sem gerir góða hönnun er að sá sem er að skoða hana sé ánægður með hana og sjái í henni eitthvað sem honum líkar vel við.

Hvað er áhugaverðast núna?
Mögulega bókin Íslensk Samtímahönnun? Ekki af því að hún er svona falleg bók, heldur út af framtakinu að hálfu Hönnunarmiðstöðvar og Crymogeu. Þrátt fyrir skotið mitt á bókaútgáfur og svona bækur hér fyrr, þá eru þær mikilvægar. Sérstaklega þegar tekið er svona þröngur hópur og skoðaður. Það má ekki gleyma að svona rit er ekki bara gert til að vera fallegt og upphefja góða hönnun, heldur eru svona rit mikilvæg gögn til að varðveita hönnunarsögu okkar. Og það að þessi bók hafi komið út á þessum tíma er jafnvel enn merkilegra og sýnir bara hvað hönnun á alltaf við, mögulega núna meira en áður. Það er mín von að Hönnunarmiðstöð láti bókina aðeins vera þá fyrstu í heilli röð bóka um íslenska hönnun.

Hönnun allra tíma?
Fyrir mér held ég að það verði alltaf eitt tiltekið plakat. Ekki endilega af því að mér finnst það vera besta hönnun allra tíma, heldur er það sá hlutur sem kveikti fyrir alvöru hjá mér þann áhuga sem ég hef á faginu í dag. Þetta plakat sýndi mér um leið þann heim hönnunar sem ég heillaðist fyrst af og er enn í dag sá heimur sem mér þykir vænst um. Þetta er plakatið Der Film eftir svissneska hönnuðinn Josef Muller-Brockmann.

Hér og þar?
Ég fékk mjög athyglisverða athugasemd varðandi bókina Íslensk samtímahönnun þegar hún kom út, en það var að hún væri svakalega útlensk í útliti. Þetta fékk mig til að hugsa til baka um hvernig ég hugsaði þessa bók í gegnum ferlið og ég held að niðurstaðan sé einfaldlega að ég hugsi ekki um þetta þegar ég hanna. Ég held að það myndi bara trufla mig. Þetta snýst aftur um þessa hugsun mína að hanna hvern hlut sem bestan fyrir þann tilgang sem hann þjónar. Global eða local fer bara eftir hlutnum, tímanum og tilfinningunni.

Allar nánari upplýsingar um myndefni og ljósmyndara er að finna á vefsíðu Harðar Lárussonar.