Sýningin Samfélag í bleyti verður framlag Íslands á 20. alþjóðlega Feneyjatvíæringinn í arkitektúr sem fer fram árið 2027. Samfélag í bleyti veltir upp spurningum um samfélagslegt hlutverk arkitektúrs og setur íslenska baðmenningu fram sem einstakan vettvang jafnræðis og mótvægi við aukinn einmanaleika og sundrung samtímans.

Marcos Zotes, Kristín Eva Ólafsdóttir, Rán Flygenring, Perla Dís Kristinsdóttir, Hrólfur Karl Cela, Nils Wiberg

Sýningarstjóri er Marcos Zotes, arkitekt og einn af eigendum Basalt arkitekta. Með honum í teymi eru arkitektarnir Hrólfur Karl Cela og Perla Dís Kristinsdóttir frá Basalt arkitektum, hönnuðirnir Kristín Eva Ólafsdóttir og Nils Wiberg frá Gagarín, auk Ránar Flygenring, mynd- og rithöfundar.

Sýningarteymið sameinar sérþekkingu á sviði arkitektúrs, gagnvirkrar hönnunar, sjónrænnar frásagnar og íslenskrar bað- og sundlaugarmenningar.

Basalt arkitektar vinna með arkitektúr og landslag þar sem tengsl byggðs umhverfis við náttúru, staði og samfélag eru í forgrunni. Stofan var stofnuð af Sigríði Sigþórsdóttur árið 2009 og er í dag leidd af henni ásamt Hrólfi Karli Cela, Marcos Zotes og Perlu Dís Kristinsdóttur. Basalt arkitektar hafa hannað fjölda bað- og sundstaða, þar á meðal sundlaugina á Hofsósi, Guðlaugu á Akranesi, Skógarböðin í Eyjafirði og Bláa Lónið. Stofan hefur hlotið innlendar og alþjóðlegar viðurkenningar fyrir framlag sitt til þróunar íslenskrar samtíma baðmenningar. 

Gagarín er hönnunarstofa sem starfar á alþjóðlegum vettvangi fyrir söfn, gestastofur, almenningsrými, vörumerki og upplifunarverkefni. Stofan er þekkt fyrir framúrskarandi hugmyndir og lausnir sem hafa markað nýja nálgun í hönnun gagnvirkra sýninga og upplifunar, þar sem sjónræn miðlun, gagnvirk tækni og rýmishönnun fléttast saman í heildstæða upplifun með það að markmiði að skapa skýr og eftirminnileg tengsl milli fólks, staða, þekkingar og hugmynda. 

Rán Flygenring er margverðlaunaður hönnuður, rithöfundur og myndhöfundur. Hún er m.a. höfundur bókarinnar Sketching/Bathing in Iceland, sjónrænnar leiðsögubókar um íslenska sundlaugamenningu sem kom út árið 2025. Verk hennar eru þekkt fyrir lifandi og marglaga frásagnir þar sem sterkur myndrænn stíll sameinast húmor og leikgleði, oft með sterka pólitíska skírskotun.

Marcos Zotes, sýningarstjóri og arkitekt,  Basalt arkitektar

Hrólfur Karl Cela, arkitekt, Basalt arkitektar

Perla Dís Kristinsdóttir, arkitekt, Basalt arkitektar

Kristín Eva Ólafsdóttir, hönnuður, Gagarín

Feneyjatvíæringur í arkitektúr er einn mikilvægasti viðburður á sviði arkitektúrs á heimsvísu. Arkitektúr hefur verið hluti af Feneyjatvíæringnum í listum frá árinu 1968, en fékk sinn eigin vettvang árið 1980.  Mennta- og menningarmálaráðuneyti Íslands fól Miðstöð hönnunar og arkitektúrs umsjón með framkvæmd verkefnisins. Lestu þér meira til um Feneyjatvíæringinn í arkitektúr og framkvæmdina hér. 

Smelltu hér hér að sjá staðsetningu skálans á korti

Castello 2125 (Ramo de la Tana), 30122 Feneyjum

Feneyjatvíæringur í arkitektúr

Feneyjatvíæringur í arkitektúr er einn mikilvægasti viðburður á sviði arkitektúrs á heimsvísu. Arkitektúr hefur verið hluti af Feneyjatvíæringnum í listum frá árinu 1968, en fékk sinn eigin vettvang árið 1980.

Upphaflega tók arkitektatvíæringurinn í arkitektúr yfir örlítinn hluta hinnar sögufrægu skipasmíðastöðvar Arsenale, en samfara vexti arkitektatvíæringsins hefur sá hluti þróast, stækkað og verið hluti af sýningarrými myndlistar- og arkitektatvíæringsins allar götur síðan, ásamt Giardini sýningarsvæðinu. Á tvíæringnum koma saman aðilar sem vinna á vettvangi arkitektúrs og þróun manngerðs umhverfis, t.a.m. fulltrúar ríkja, sveitarfélaga, arkitektar og hönnuðir, sérfræðingar á sviði byggingartækni, framleiðendur byggingarefna, fjárfestar og þróunaraðilar bygginga svo einhverjir séu nefndir. Árið 2023 voru 63 þjóðir sem tóku þátt í tvíæringnum og voru sýningagestir yfir 285.000 talsins og komu þeir allstaðar að úr heiminum. 

Árið 2023 samþykkti alþingi aðgerðaráætlun í málefnum hönnnunar og arkitektúrs um þátttöku Íslands í Feneyjartvíæringnum og hófst undirbúningsvinna strax í kjölfarið. Árið 2024 var í fyrsta sinn kallað eftir tillögu í opnu kalli að sýningu Íslands fyrir tvíæringinn í arkitektúr. Mennta- og menningarmálaráðuneyti Íslands fól Miðstöð hönnunar og arkitektúrs umsjón með framkvæmd verkefnisins. Halla Helgadóttir framkvæmdastjóri Miðstöðvar hönnunar og arkitektúrs var skipaður Comissioner og Gerður Jónsdóttir ráðinn inn sem verkefnastjóri.

Verkefni s.ap arkitekta, Lavaforming, var framlag Íslands á Feneyjatvíæringnum í arkitektúr 2025. Efnt var til opins kalls í apríl 2024 og bárust alls tólf tillögur að sýningu í íslenska skálanum. Þetta var í fyrsta sinn sem Ísland tók þátt í Feneyjatvíæringnum í arkitektúr með opnu kalli. 

Í verkefninu Hraunmyndanir (e. Lavaforming) er sögð saga framtíðarsamfélags sem þróar framsæknar lausnir í mannvirkjagerð. Hraunrennsli er beislað, nýtt sem byggingarefni og tekst með því að umbreyta staðbundinni ógn í auðlind. 

Sýningarteymi Feneyjatvíæringsins kemur frá s. ap arkitektum, sem er þverfagleg rannsóknarstofa með áherslu á tilgátuverkefni framtíðarinnar, og þverfaglegra samstarfsaðila. Í sýningarteyminu voru Arnhildur Pálmadóttir, Arnar Skarphéðinsson, Björg Skarphéðinsdóttir, Sukanya Mukherjee, Jack Armitage og Andri Snær Magnason. Um grafíska hönnun sá hönnunarstofan Studio Studio og var Markús Þór Andrésson, deildarstjóri sýninga og miðlunar hjá Listasafni Reykjavíkur ráðgjafi sýningarinnar. 

Sýningin samfélag í bleyti verður framlag Íslands á Feneyjatvíæringnum í arkitektúr 2027. Efnt var til opins kalls í desember 2025 og bárust alls níu tillögur að sýningu íslenska skálans. 

Í nóvember 2025 var skipaður átta manna stýrihópur fagfólks og hagaðila sem samþykktur var af stjórn MH&A. 

Fyrir hönd Miðstöðvar hönnunar og arkitektúrs
Halla Helgadóttir framkvæmdastjóri og formaður stýrihóps.

Fyrir hönd Listaháskóla Íslands
Massimo Santanicchia, arkitekt, prófessor og deildarforseti í arkitektúr við LHÍ.

Fyrir hönd Arkitektafélags Íslands
Arnhildur Pálmadóttir arkitekt, s. ap arkitektar

Fyrir hönd Félags íslenskra landslagsarkitekta
Daníel Jakobsson, landslagsarkitekt, Landslag

Fyrir hönd Félags húsgagna- og innanhússarkitekta
Rósa Dögg Þorsteinsdóttir, innanhúsarkitekt, Ljósark

Fyrir hönd SAMARK
Unnar Örn J. Auðarson, myndlistarmaður, Samark

Fyrir hönd Íslandsstofu
Kristjana Rós Guðjohnsen, fagstjóri lista og skapandi greina

Fyrir hönd menningar- og viðskiptaráðuneytis
Baldur Ó. Svavarsson, arkitekt, Úti og inni