Vilt þú leggja þitt af mörkum? Samráð um gerð leiðbeininga um flokkun mannvirkja

Það er mikilvægt að þeir aðilar sem starfa í mannvirkjagerð fái að koma að samráði um gerð leiðbeininga. Húsnæðis-og mannvirkjastofnun hefur haft samband og óskar eftir því að Arkitektafélag íslands tilnefni einn til tvo fulltrúa um gerð leiðbeininga um flokkun mannvirkja.

Við óskum eftir því að allir áhugasamir sendi póst á netfangið ai@ai.is og óski eftir þátttöku í þessari vinnu. Um leið viljum við nýta tækifærið og þakka Hildi Gunnarsdóttur og Árna Friðrikssyni, sem sátu í starfshópi sem falið var að gera tillögur að reglugerð um flokkun mannvirkja, kærlega fyrir sitt framlag til þessarar vinnu.

Hér koma fram frekari upplýsingar frá Húsnæðis-og mannvirkjastofnun:

Lögum um mannvirki nr. 160/2010 (MVL) var breytt með lögum 134/2020 og kveðið á um flokkun mannvirkja. Með reglugerð 1321/2021 var byggingarreglugerð nr. 112/2012 (brgl.) breytt og nánar kveðið á um flokkun mannvirkjagerðar í þrjá umfangsflokka. Á nokkrum stöðum í reglugerðinni var kveðið á um að Húsnæðis- og mannvirkjastofnun (HMS) skyldi gera leiðbeiningar til frekari skýringar á flokkuninni.

En það er meðal helstu verkefna HMS að annast gerð leiðbeininga í samráði við Samband íslenskra sveitarfélaga (SÍS) og aðra hagsmunaaðila, skv. 2. tl. 1. mgr. 5. gr. MVL. Allt frá því að reglugerðin tók gildi hefur HMS unnið að gerð leiðbeiningar um flokkun auk annarra leiðbeininga sem tengjast breytingunni. Nánar tiltekið eru eftirfarandi leiðbeiningar í vinnslu:

Gerð verður ný leiðbeining við ákvæði 1.3.1. gr. brgl. (flokkun mannvirkja) með nánari skýringum um framkvæmd flokkunar og sýnidæmum. Að sama skapi þarf að vinna leiðbeiningu við ákvæði 2.3.5. gr. brgl. (minniháttar mannvirkjagerð sem er undanþegin tilkynningu og leyfum). Eins verður að endurskoða leiðbeiningu um 2.3.6. gr. (tilkynningaskyldar framkvæmdir). En ákvæðin tóku breytingum í síðustu reglugerðarbreytingu. Þá þarf að endurskoða gildandi leiðbeiningu um 2.3.1. gr. brgl. (byggingarleyfisskyldar framkvæmdir) og gera grein fyrir byggingarheimild. Þá telur HMS rétt að endurskoða leiðbeiningu um 2.6.1. gr. brgl. (stöðuleyfi) og 3.7.3. gr. brgl. (stöðuskoðun) með tilliti til flokkunar mannvirkja.

Þannig eru í vinnslu tvær nýjar og fimm endurskoðaðar leiðbeiningar. Markmiðin eru að skýra betur flokkun mannvirkja. Rétt er að geta þess að við gerð reglugerðarinnar voru settar meginreglur sem eru ófrávíkjanlegar og viðmiðunarreglur til fyllingar sem eru frávíkjanlegar. Skýrar leiðbeiningar eru nauðsynlegar til að koma í veg fyrir misskilning og ósamrýmda túlkun brgl. í framkvæmd.

Fyrir utan SÍS mun HMS einnig óska eftir samráði við Félag byggingarfulltrúa, Samtök iðnaðarins og Samband slökkviliða á höfuðborgarsvæðinu, en þessir aðilar áttu m.a. fulltrúa í fyrra samráði. Til viðbótar mun Verkfræðingafélagi Íslands, Framkvæmdasýslunni-ríkiseignum og Neytendasamtökunum boðin þátttaka. 

Þegar tilnefningar allra hagsmunaaðila hafa borist, mun HMS boða til fundar með samráðshópnum og kynna fyrirhuguð drög. Hópnum mun síðan gefið færi á að koma skriflega á framfæri tillögum og athugasemdum. HMS mun í framhaldinu yfirfara þær athugasemdir og tillögur og aðlaga leiðbeiningarnar til samræmis. Verður boðað til fundar með samráðshópnum til að gera grein fyrir framkomnum athugasemdum og breytingum. Í framhaldinu verða leiðbeiningarnar svo birtar á heimasíðu HMS og öðrum hagsmunaaðilum og almenningi gefinn kostur á að koma að athugasemdum áður en þær taka gildi.