HA / Fréttir

Auglýst er eftir tillögum að sýningu á íslenskri hönnun og arkitektúr á alþjóðlegu hönnunarhátíðinni 3daysofdesign, sem fram fer í Kaupmannahöfn 9.–11. júní 2027.  Leitað er að hönnuðum, arkitektum, teymum eða fyrirtækjum með sterka hugmynd að sýningu og metnað til að nýta þátttöku í 3daysofdesign til að auka sýnileika, efla alþjóðleg tengsl og skapa viðskipti.

Hönnunarverðlaun Íslands varpa ljósi á mikilvægi og gæði hönnunar og arkitektúrs á Íslandi með áherslu á áhrif þeirra á lífsgæði, verðmætasköpun og sjálfbærni fyrir samfélagið allt. Verðlaunin verða afhent í hátíðarsal Grósku fimmtudaginn 5. nóvember nk. Öll eru hjartanlega velkomin en við biðjum gesti vinsamlegast um að skrá sig á viðburðinn hér.

Hillukerfið Lína 99 eftir Gunnar Magnússon, sem íslenska hönnunarfyrirtækið FÓLK hefur endurútgefið í nýjum búningi, hefur hlotið tvær tilnefningar til Bo Bedre hönnunarverðlaunanna 2026 í Danmörku. Verkið er tilnefnt í flokkunum Græn hönnun ársins og Lesendaverðlaun ársins. Verðlaunin verða afhent 3. nóvember næstkomandi.

Mystic Garden er safn glerlampa eftir Brynjar Sigurðarson og Veroniku Sedlmair hjá Studio Brynjar og Veronika. Safnið samanstendur af handblásnum glerhlutum þar sem tilraunir með efni, lit og ljós mæta frásögnum sem sækja í náttúru, rómantík og hið yfirnáttúrulega. Mystic Garden er tilnefnt til Hönnunarverðlauna Íslands 2026 í flokknum vara.

Leiftur er björgunarbátur hannaður af Páli Einarssyni fyrir Rafnar. Báturinn er hluti af sístækkandi vörulínu björgunarbáta Rafnar sem eru í notkun víða um heim. Leiftur er tilnefndur til Hönnunarverðlauna Íslands 2026 í flokknum vara.

Backflip er fellistóll hannaður af Guðmundi Lúðvík fyrir HAY. Stóllinn er endurhugsun á kunnuglegu húsgagni þar sem fellibúnaðurinn hverfur inn í bakið og fegurð, þægindi og form eru í fyrirrúmi. Backflip er tilnefndur til Hönnunarverðlauna Íslands 2026 í flokknum vara.

Óskaland er viðbygging við samnefndan leikskóla í Hveragerði, hönnuð af marimo arkitektum, þar sem arkitektúr, innanhússhönnun, sérhannaðar innréttingar og fjölbreytt garðrými mynda leikandi og notalegt umhverfi út frá skala, sjónarhorni og upplifun barnsins. Óskaland er tilnefnt til Hönnunarverðlauna Íslands 2026 í flokknum staður.

Vitrum Iceland er verk eftir hönnuðinn Johönnu Seelemann sem spannar rannsóknir, tilraunir, hönnun, framleiðslu og sýningu. Johanna sameinar handverk og iðnað og skapar framúrskarandi lausnir, ferla og gripi úr endurunnu gleri. Verkin, hliðarborð, vegglampar, vasar, hillur og stóll, voru sýnd í H,A,K,K galleríi. Vitrum Iceland er tilnefnt til Hönnunarverðlauna Íslands 2026 í flokknum verk.

Sketching Bathing in Iceland er verk sem fjallar um sundlaugarmenningu Íslendinga eftir Rán Flygenring. Verkið var gefið út í samnefndri bók og birtist í sýningu og baðteiknismiðjum í þremur sundlaugum í Reykjavík. Sketching Bathing in Iceland er tilnefnt til Hönnunarverðlauna Íslands 2026 í flokknum verk.

Jón Helgi Hólmgeirsson er hönnuður í fókus í októbermánuði. Hann er vöru- og samspilshönnuður sem hefur komið víða við á sínum ferli. Hann hefur meðal annars hannað fyrir IKEA, Norður Salt, FÓLK Reykjavík og Genki Instruments, þar sem hann starfaði sem yfirhönnuður í átta ár. Í dag er hann fagstjóri meistaranáms í hönnun við Listaháskóla Íslands, situr í listrænu teymi DesignTalks 2027 og hefur nýverið opnað sýningu þar sem blóm vakna til lífsins í samspili ljóss og skugga.

Á tímum þegar vindar blása úr öllum áttum beinum við sjónum að sköpunargleðinni, forvitninni og kraftinum sem býr í hönnun og arkitektúr. Næsti fyrirlestur Tölum um hönnun og arkitektúr fer fram í stóra sal Grósku næsta miðvikudag, 21. október, kl. 9:00-10:00. Húsið opnar að vanda kl. 8:30 með rjúkandi heitum bolla og bakkelsi.

Nú er nýafstaðin veisla á sviði grafískrar hönnunar og miðlunar þegar AGI Open var haldin í Reykjavík þann 1. og 2. október s.l. Þar stigu á stokk á fimmta tug erlendra hönnuða, listrænna stjórnenda og listamanna í fremstu röð og fullt var út úr dyrum bæði á fyrirlestra deginum í Gamla bíó og blandaðri dagskrá í Grósku.