Fullt út úr dyrum á opnun Hraunmyndana (e. Lavaforming)

Það var mikil stemning og spenna í loftinu í Listasafni Reykjavíkur í Hafnarhúsinu síðastliðinn föstudag 23. janúar þegar sýningin Hraunmyndanir opnaði. Logi Einarsson, menningar-, nýsköpunar- og háskólaráðherra, opnaði sýningarnar og Maó Alheimsdóttir skáld flutti ljóðagjörning ásamt Marion Herrera hörpuleikara. Kristrún Frostadóttir, forsætisráðherra, var einnig viðstödd opnunina.

Sýningin verður opin fyrir gesti og gangandi til 26. apríl.

Hraunmyndanir er djörf hugmynd um mögulega framtíð þar sem rennandi hraun úr iðrum jarðar er notað sem byggingarefni mannvirkja og borga. Sýningin byggir á framsækinni hugmynd sem sýnir tilraunir og tækifæri í notkun á hrauni. Þannig er staðbundinni ógn breytt í auðlind sem lausn við hnattrænum vanda.

„Skapandi hugsjónafólk, arkitektar, hönnuðir og listamenn, gegna lykilhlutverki í að takast á við þær umhverfisáskoranir sem stafa af loftslagsbreytingum,“ segir Logi Einarsson, menningar-, nýsköpunar- og háskólaráðherra Íslands. „Það sem gerir Lavaforming svo áhrifamikið er að verkefnið snýst ekki aðeins um að ímynda sér grænni framtíð heldur leitast það við að kanna hvernig megi skapa hana. Lavaforming er skýrt dæmi um hvernig skapandi greinar móta djörf og hagnýt viðbrögð við loftslagsvá í sterkum tengslum við umhverfið, innblásið af vísindalegri þekkingu og knúið áfram af sköpunarkrafti og hugmyndaauðgi.“

Höfundar verksins Hraunmyndanir eru Arnhildur Pálmadóttir, Björg Skarphéðinsdóttir og Arnar Skarphéðinsson hjá s.ap arkitektum og Andri Snær Magnason sem mótaði frásögn verksins. Sýningar- og ráðgjafateymi verkefnisins samanstendur jafnframt af Sukanyu Mukherjee, Jack Armitage, tónlistarmanni og margmiðlunarhönnuði, grafísku hönnunarstofunni Studio Studio og Markúsi Þór Andréssyni hjá Listasafni Reykjavíkur auk þess sem Halldór Ásgeirsson myndlistarmaður vann að hraunbræðslu fyrir verkefnið.