Vel heppnaður hittingur þátttakenda HönnunarMars 2026

Þriðjudaginn 17. febrúar fór fram vel heppnaður hittingur þátttakenda HönnunarMars í Fantasíu, þar sem hönnuðir komu saman til að tengjast, skála og stilla saman strengi fyrir hátíðina framundan.

Boðið var upp á léttar veitingar og skálað fyrir hátíðinni sem framundan er, en jafnframt var farið yfir helstu praktísku atriði og mikilvægar dagsetningar tengdar framkvæmd hátíðarinnar. Þátttakendur fengu tækifæri til að bera upp spurningar, deila hugmyndum og tengjast öðrum. Andrúmsloftið einkenndist af jákvæðni og tilhlökkun fyrir því sem koma skal. 

Strik Studio kynnti einkenni hátíðarinnar og gaf gestum innsýn í sérhannað forrit sem mun auðvelda þátttakendum að útbúa efni fyrir sýningar og viðburði. Forritið er fyrsta sinnar tegundar á Íslandi. Þar geta þátttakendur hlaðið upp eigin myndefni og og búið til sjálfvirka hreyfigrafík sem endurspeglar þema hátíðarinnar, Tengingar, til dreifingar á sínum miðlum. 

Einnig fengum við góða heimsókn frá Cathrine “Cat” Frederiksen frá Digido Marketing, sem deildi hagnýtum og skapandi ráðum um hvernig megi nýta samfélagsmiðla til að segja frá sýningum og viðburðum í aðdraganda hátíðarinnar. 

Við þökkum öllum sem mættu kærlega fyrir komuna.