Kristjana S. Williams stígur á svið á DesignTalks 2026

Það er mikill heiður að kynna næsta fyrirlesara fyrir DesignTalks í ár. Kristjana S. Williams hefur skapað sér sess á alþjóðlegum vettvangi með einstökum stíl í sjónrænni frásagnarlist. Hún lærði grafíska hönnun og myndskreytingar við Central Saint Martins og vinnur í mjög fjölbreytta miðla, s.s. hand- og laser-skornar klippimyndir, myndlýsingar, teikningar og stafræn hönnunarverk.

Kristjana hefur verið búsett í London síðustu áratugi þar sem hún rekur eigin vinnustofu og hefur unnið fyrir fjölmarga aðila s.s. Harrods, Fortnum & Mason, Paul Smith og hljómsveitina Coldplay.

Auk þess sem verk hennar hafa verið sýnd á söfnum og listviðburðum um allan heim, m.a. Victoria & Albert safninu í London og í Vatikaninu og unnið til margra verðlauna og viðurkenninga.

„Ég sé það betur og betur að mörg verka minna snúast um að draga úr fjarlægð. Við lifum í heimi þar sem við fáum stöðugt upplýsingar; skýrslur, skjalasöfn, sögu og gögn en það getur orðið yfirþyrmandi eða óhlutstætt. Mig vekur áhuga hvernig sjónræn frásögn getur gert þetta aftur mannlegt. Hvernig flókin saga eða brot úr sögu má umbreyta í eitthvað sem fimm ára og níutíu og fimm ára geta báðir tengst á sinn hátt,“ segir Kristjana S.Williams.

Tryggðu þér miða! Forsölu lýkur 9. mars nk. á Tix.is - fyrstur kemur, fyrstur fær!