ALARK arkitektar hljóta fyrstu verðlaun í skipulagssamkeppni um Akureyrarvöll

Arkitektastofan ALARK arkitektar hlýtur fyrstu verðlaun í samkeppni um skipulag Akureyrarvallar og nágrennis. Alls bárust 16 tillögur í samkeppnina sem Akureyrarbær efndi til í samstarfi við Arkitektafélag Íslands. Ein tillaga reyndist ógild og fjallaði dómnefnd því um 15 gildar tillögur.

Tilgangur samkeppninnar var að kalla eftir spennandi landslagshönnun og arkitektúr fyrir svæðið, auk þess að fá fram raunhæfa tillögu að miðbæjarumhverfi sem væri eftirsóknarvert til búsetu og lifandi vettvangur fyrir fjölbreytta starfsemi í hjarta Akureyrarbæjar.

Megináherslur dómnefndar

Við mat á tillögum lagði dómnefnd meðal annars áherslu á heildaryfirbragð, notagildi og vandaðan arkitektúr bygginga og útisvæða, með hliðsjón af staðaranda og veðurfarsskilyrðum.

Einnig var horft til þess að uppbygging miðsvæðisins styrkti núverandi innviði bæjarins og tengdi hverfahluta betur saman. Þá var lögð áhersla á aðgengis-, umferðar- og öryggismál, tengingar við stígakerfi Akureyrarbæjar, sögu Akureyrarvallar og kennileiti svæðisins, svo sem klappir og gróður.

Dómnefnd lagði jafnframt áherslu á umhverfissjónarmið og sjálfbærni við hönnun og efnisval, auk þess sem tillögur skyldu vinna með og draga úr áhrifum Glerárgötu.

Vinningstillagan, Akureyrarvöllur, er að mati dómnefndar heildstæð og sannfærandi tillaga sem skapar eftirsóknarvert miðbæjarsvæði og gott búsetuumhverfi. Tillagan vinnur vel með staðaranda og sögu svæðisins, styrkir tengingar við nærliggjandi hverfi og endurvekur Akureyrarvöll sem lifandi samkomustað.

Í dómnefndaráliti segir m.a. um verðlaunatillöguna: Helsti styrkur tillögunnar felst í skýrri heildarsýn og raunhæfri nálgun á þróun svæðisins. Að mati dómnefndar myndast gott samspil milli miðbæjar og norðursvæða þannig að til verður skýr tengipunktur. Sterk landslagshönnun og sögulegar skírskotanir eru bæði aðlaðandi og raunhæfar í rekstri með eðlilegu viðhaldi.

Í öðru sæti var tillaga marimo arkitekta, Brúum hjarta Akureyrar, auðkennd #481839, og í þriðja sæti var tillaga Teikna - Teiknistofu Arkitekta, Vallartorg, auðkennd #505020.

Í dómnefnd sátu:

Tilnefnd af kaupanda:
Halla Björk Reynisdóttir, forseti bæjarstjórnar Akureyrar og formaður skipulagsráðs, formaður dómnefndar
Hlynur Jóhannsson, bæjarfulltrúi Miðflokksins á Akureyri
Sindri Kristjánsson, áheyrnarfulltrúi Samfylkingarinnar í skipulagsráði

Tilnefnd af Arkitektafélagi Íslands:
Borghildur Sölvey Sturludóttir, arkitekt FAÍ, HMS

Tilnefnd af Félagi íslenskra landslagsarkitekta:
Fríða Björg Eðvarðsdóttir, landslagsarkitekt FÍLA

Ritarar dómnefndar:
Einar Sigþórsson, verkefnastjóri skipulagsmála hjá Akureyrarbæ
Rebekka Rut Þórhallsdóttir, fulltrúi skipulags- og byggingarmála hjá Akureyrarbæ

Trúnaðarmaður dómnefndar:
Gerður Jónsdóttir

Dómnefnd var einróma í niðurstöðu sinni og óskar vinningshöfum til hamingju með góðar tillögur og þakkar keppendum öllum fyrir faglega unnar og fjölbreyttar tillögur.