Þriðjudaginn 11. maí milli kl. 13-15 verður beint streymi á málstofu um húsnæðismál, spunnið út frá arkitektónískum og hagrænum rannsóknum sem kynntar verða í samhengi við húsnæðisuppbyggingu á Íslandi. Í samtalinu er áherslunni beint að íbúanum og gæðum í hönnun og skipulagi, því að skapa híbýlaauð fyrir þá sem búa ekki síður en þá sem byggja.  


Fyrir hvern er verið að byggja? 
Magn, framboð og fermetrar eru fyrirferðarmiklir þættir í umræðu um húsnæðismál. Spurt er hversu mikið á að byggja en ekki hvernig á að byggja. Fátt er hins vegar mikilvægara fyrir líf okkar og lífsgæði en það hvernig við búum og hvernig húsnæði og umhverfið í kringum okkur er skipulagt og hannað.  
 
Gæði fyrir alla eða útvalda?
Lýðheilsu- og umhverfisáskoranir samtímans kalla sem aldrei fyrr á gæði hönnunar við íbúðauppbyggingu. Birta, rýmisgerð, sól og skjól eru meðal mikilvægra áhrifaþátta á líðan og daglegt líf, almannagæði, sem koma til kastanna við uppbyggingu íbúða og þéttingu byggðar. Til að efla almannagæði samfara húsnæðis-uppbyggingu er mikilvægt að beina sjónarhorninu að íbúanum, líðan hans og upplifun í daglegu lífi. Að huga að listinni að búa samfara listinni að byggja og skapa híbýlaauð fyrir þá sem búa, ekki síður en þá sem byggja. 

Verkefnið HÍBÝLAAUÐUR hefur að markmiði að miðla þverfaglegum rannsóknum, þar sem áherslan er á gæði húsnæðis, áhrifamáttinn og auðlegðina sem í þeim felast. Með vísan í ný og nýleg dæmi er skyggnst bakvið þróun í húsnæðismálum á Íslandi í alþjóðlegu samhengi og sögulegri vídd. Markmiðið er að brýna þekkingu fag- og fræðafólks á sviði hönnunar og arkitektúrs í samtali við aðrar faggreinar og framkvæmdaaðila, til áhrifa á sviði húsnæðismála. Viðburðurinn í Norræna húsinu er hluti stærra viðburða- og útgáfuverkefnis á vegum ÚRBANISTAN og arkitektanna Önnu Maríu Bogadóttur, Hildar Gunnarsdóttur, Hólmfríðar Ósmann Jónsdóttur og Hrefnu Bjargar Þorsteinsdóttir, Ásgeirs Brynjars Torfasonar, doktors í fjármálum og Snæfríðar Þorsteins, hönnuðar. Verkefnið hefur hlotið styrk úr Hönnunarsjóði og Miðstöð íslenskra bókmennta. 


13.00 LÚXUS FYRIR ALLA?
 ANNA MARÍA BOGADÓTTIR, arkitekt og menningarfræðingur
 innleiðir samtalið um listina að búa og listina að byggja: 
 Hvar er pláss til að anda?

13.15 HVER GRÆÐIR Á ÞESSU?
 ÁSGEIR BRYNJAR TORFASON, doktor í fjármálum
 rýnir í hagræna og hagsögulega þætti íbúðauppbyggingar í samtali við hagfræðing: 
 Er dýrt að byggja ódýrt? 

14.40 GLÆTAN?!
 HREFNA BJÖRG ÞORSTEINSDÓTTIR & HÓLMFRÍÐUR ÓSMANN JÓNSDÓTTIR, arkitektar
 kynna rannsóknir sínar á dagsbirtu í fjölbýlishúsum  ásamt ÁSTU LOGADÓTTUR doktor í rafmagnsverkfræði: 
 Er gluggi ekki bara gluggi?

14.05 HVAR Á PÍANÓIÐ AÐ VERA?
 HILDUR GUNNARSDÓTTIR, ARKITEKT
 rýnir í rýmismótun, stærð og gæði almennra íbúða í samtali við Björn Arnar Magnússon framkvæmdastjóra Brynju,  hússjóðs Öryrkjabandalags Íslands og Pál Gunnlaugsson arkitekt og meðeiganda ASK arkitekta: 
 Hvenær runnu leiksvæðið og bílastæðið saman í eitt?
 
 14.30 ER EINHVER FRAMTÍÐ Í ÞESSU?
 Fulltrúar úr framlínu húsnæðisuppbyggingar, þeirra sem búa og byggja, leggja orð í belg: 
 Á að splæsa í gæði fyrir alla?
 
 Viðburðurinn er á dagskrá Hönnunarmars og í samstarfi við Norræna húsið.
 

Híbýlaauður - Samtal um húsnæðismál á mannamáli

Deila

Tögg