Listamannaspjall: Snert á landslagi
Fimmtudaginn 19. september fer fram sýning á jarðhæð Loftskeytastöðvarinnar á nokkrum verkum hönnuðarins Tinnu Gunnarsdóttur úr yfirstandandi doktorsverkefni hennar ásamt listamannaspjalli við hana og Guðbjörgu R Jóhannesdóttur, lektor við listkennsludeild Listaháskóla Íslands.
Snert á landslagi er vinnutitill yfirstandandi doktorsverkefnis Tinnu Gunnarsdóttur, þar sem áhersla er lögð á að virkja fagurferðilega upplifun í landslagi sem afl til umbóta. Á viðburðinum fá gestir tækifæri til að skoða verk hennar ásamt því að taka þátt í umræðum um verkefnið og rannsóknir í samræðum við dósent Guðbjörgu R. Jóhannesdóttur.
Farið verður yfir hugtökin landslag og fagurfræði, sem eru mun dýpri og yfirgripsmeiri en þau virðast við fyrstu sýn. Þau fjalla ekki einungis um ásýnd heldur raunverulega snertingu okkar við heiminn, þar sem maður og landslag mætast og hafa áhrif hvort á annað. Þungamiðja verkefnisins er áralöng tilviksrannsókn í Héðinsfirði á norðanverðum Tröllaskaga, þar sem Tinna beitir meðal annars fjölbreyttum aðferðum hönnunar í þeim tilgangi að skapa snertifleti þar sem þessum tengslum er veitt sérstök athygli.
Tinna nýtir hönnunarrannsóknir og nytjahluti hversdagsins til að skoða umhverfi sitt, hvort sem það á við um einkarými heimilisins eða náttúrulegt samhengi. Hún setur efni og tækni í óvæntar aðstæður og skapar þannig ný sjónarhorn, útvíkkaða upplifun, kynlegt samhengi. Íslenskt landslag hefur haft mikil áhrif á meðvitund hennar og rýmisskilning, sem hún svo miðlar í gegnum efnislæga hluti.
Tinna Gunnarsdóttir er vöruhönnuður og lærði hönnun í Englandi, Þýskalandi og á Ítalíu og hefur rekið hönnunarstúdíó í Reykjavík frá 1993. Verk hennar hafa verið sýnd víða, bæði hérlendis og á alþjóðlegum vettvangi. Tinna hefur kennt við hönnunardeild Listaháskóla Íslands frá stofnun skólans og var fagstjóri brautar í vöruhönnun frá 2010-13 og prófessor frá 2016-22. Um þessar mundir stundar Tinna doktorsnám í menningarfræði við Háskóla Íslands þar sem hún beinir sjónum sínum að íslensku landslagi og hinum flóknu tengslum manns og náttúru á tímum mannaldar.
Guðbjörg R. Jóhannesdóttir er lektor við listkennsludeild Listaháskóla Íslands ásamt því að vera nýdoktor við Heimspekistofnun Háskóla Íslands. Umhverfisheimspeki hefur verið í forgrunni í verkum hennar síðan hún hóf nám í heimspeki við Háskóla Íslands. Rannsóknir Guðbjargar beinast að umhverfisfagurfræði, umhverfissiðfræði, fyrirbærafræði, skynjaðri þekkingu, líkamleika, landslagi, þverfaglegu starfi og þátttöku.
Viðburðarrýmið opnar kl 17:00 og listamannaspjallið hefst kl 17:15.
Sýningin ‘Ljáðu mér vængi’ í aðal sal Loftskeytastöðvarinnar er opið frá kl 13:00-17:00
