Nýtt útlit HönnunarMars í Brand Identity

Fjallað er um nýtt útlit HönnunarMars hjá Brand Identity, víðlesnum og vinsælum miðli sem fjallar um hönnuði, vörumerki og hönnun í víðu samhengi. Snorri Eldjárn, Viktor Weisshappel og Jakob Hermannsson hönnuðir Striks Stúdíó ræða við miðilinn. Útlitið var kynnt á HönnunarMars sl. apríl en Miðstöð hönnunar og arkitektúrs samdi við Strik Stúdíó um hönnun á öllu efni hátíðarinnar til þriggja ára.

„Það var mikill heiður að taka við keflinu í ár,“ segir Snorri Eldjárn hönnuður Strik Stúdíó við Brand Identity. „Verkefnið var í raun tvöfalt, við vorum beðin um að hanna sveigjanlegt vörumerki HönnunarMars til framtíðar en jafnframt hanna útlit sérstaklega fyrir þema hátíðarinnar síðastliðið vor sem var Uppspretta eða Source.“ 

„Lykilhugmyndin er þetta breytilega sjónarhorn (e. Shifting Perspectives). Við bjuggum til dínamískt myndefni sem sýnir breidd hátíðarinnar en líka sveigjanleika til þess að hanna útlit framtíðarhátíða,“ útskýrir Viktor Weisshappel hönnuður.  

Jakob Hermannsson hönnuður útskýrir í samtali við Brand Identity að á hátíðinni séu fjöldi sýninga hönnuða og arkitekta um alla borg - og verk og sýningar flæði jafnvel út á götu. „Með því að hanna síbreytilegt myndasafn leyfum við verkum hönnuðanna að vera í aðalhlutverki.“

Þeir segjast hafa verið vissir frá upphafi að vilja nota letur eftir íslenskan hönnuð og úr varð letrið Bon eftir Gabríel Markan en teymi Striks Stúdíó vann þétt með Gabríel að útfærslu letursins fyrir útlit HönnunarMars sem var áberandi í öllu kynningarefni hátíðarinnar.