Félagsmenn AÍ geta nú fengið aðild að Starfsþróunarsetri háskólamanna

Arkitektafélagið hefur samið við BHM um aðild að Starfsþróunarsetri

háskólamanna.  Félagsmenn aðildarfélaga BHM sem aðild eiga að setrinu geta sótt um 425.000 kr. styrki á 24 mánaða tímabili. Hægt er að sækja um styrki fyrir skólagjöldum, námskeiðum og ráðstefnum ásamt ferðakostnaði.

Aðild að setrinu er valkvæð og þarf hver og einn starfsmaður að óska eftir því hjá vinnuveitanda sínum að hann greiði í Starfsþróunarsetur háskólamanna um hver mánaðarmót. Iðgjöld í sjóðinn nema 0.7% af grunnlaunum sem vinnuveitandi veitir.

Lágmarksiðgjöld

• Mánaðarlegt iðgjald 2100 kr. eða hærra á mánuði veitir rétt á fullum styrk (425.000 kr.)
• Mánaðarlegt iðgjald á bilinu 1.050 kr. - 2.099 kr. veitir rétt á hálfum styrk (212.500 kr.)
• Iðgjald undir 1050 kr. veitir ekki rétt til styrks.

Hlutverk Starfsþróunarseturs háskólamanna er að stuðla að framgangi háskólamenntaðra félagsmanna þeirra aðildarfélaga BHM sem eiga aðild að setrinu og framþróun stofnana með markvissri starfsþróun.  Setrinu er ætlað að hvetja stofnanir til að styðja starfsmenn til að auka og nýta þekkingu sína í starfi, bæta við og/eða endurnýja menntun sína og veita þeim tækifæri til að þróa faglega hæfni og viðhalda þannig verðgildi sínu á vinnumarkaði. 

Hægt er að sjá hvort vinnuveitandi greiðir iðgjöld til setursins á Mínum síðum BHM.