Sýningin skart:gripur - skúlptúr fyrir líkamann opnar í Hafnarborg

Á sýningunni skart:gripur - skúlptúr fyrir líkamann má finna gripi eftir fjölbreyttan hóp gullsmiða, skartgripahönnuði og listamanna sem varpa ljósi á skartið í samtíma okkar. Sýningin opnar laugardaginn 6. apríl kl. 15 í Sverrissal í Hafnaborg og er hluti af dagskrá HönnunarMars.

Gripirnir eru eftir fjölbreyttan hóp þar sem ólík efnisnotkun, mismunandi aðferðir og handverk endurspeglast í verkum hvers og eins. Markmiðið er sýna hve margbreytilegir skartgripir eru. Þeir eiga djúpar rætur meðal allra þjóða heims, hafa raunar fylgt mannkyninu frá upphafi.

Þátttakendur eru Anna María Pitt, Arna Gná, Ágústa Arnardóttir, James Merry, Hildur Ýr Jónsdóttir, Helga Mogensen, Katla Karlsdóttir, Orr og Marta Staworowska. Sýningarstjóri er Brynhildur Pálsdóttir, hönnuður.

„Við höfum alltaf haft þessa djúpstæðu þörf á að skreyta okkur og notað skartgripi sem eins konar tungumál, efnisleg tákn sem senda skilaboð út á við. Efniviður gripanna á sýningunni er allt frá klassískum eðalmálmum yfir í ónýta símaskjái. Allt eru þetta þó skartgripir, skúlptúrar fyrir líkama. Það hefur verið afar athyglisvert að taka saman verk eftir þessa ólíku hönnuði og listamenn og varpa ljósi á skartgripi samtímans.“

Skart hefur fylgt mannkyninu frá örófi alda. Þörfin til að skreyta líkama og klæði með skarti er frumstæð og hefur djúpar rætur í menningarsögu allra þjóða. Skartgripir gegna stöðu tungumáls í menningu okkar og samfélagi. Þeir eru frásögn, tákna stöðu, miðla persónuleika og senda skilaboð. Þá endurspeglar sýningin margbreytileika í efnistökum, aðferðum og nálgun í skartgripagerð hér á landi.

Sýningin opnar laugardaginn 6.apríl og stendur til 26. maí.

Á HönnunarMars dagana 24. - 28. apríl verða viðburðir og leiðsagnir á sýningunni.