Tilnefningar til Íslenslu bókahönnunarverðlaunanna 2025

Kápa sem grípur strax athygli lesandans. Hönnunin skírskotar beint til efnis bókarinnar án þess að vera bókstafleg, allt frá brotalínu á forsíðu til saurblaða undir áhrifum afrískrar textíllistar. Ásetningur í hverju smáatriði.

Einföld en áhrifarík og grípandi kápa þar sem samspil leturs og auðs rýmis skapa óvanalega myndbyggingu.

Kápan er formföst og talar inn í samræmt útlit sem hefur verið þróað yfir mörg ár. Hér er unnið með ímynd höfundar og væntingar lesandans þar sem nafn höfundar sést varla og myndefnið vísar óbeint til inntaks bókarinnar.

Ögrandi kápa þar sem ólíkir stílar og menningarheimar mætast í samhljómi sem kallast á við umfjöllunarefni bókarinnar. Áferð, litaval og bókband er úthugsað til að lyfta efninu upp og leika sér með væntingar lesanda.

Kápa sem er grípandi í einfaldleika sínum þar sem viðfangsefnið horfir beint á lesandann. Lifandi vatnslitum og skærum sjálflýsandi lit er teflt saman í mynd sem endurspeglar höfundarverkið og bókina sem heild.

Dularfull kápa þar sem ljósmyndabrotum er skeytt saman svo að úr verður sjálfstætt myndverk sem vekur forvitni lesanda. Áhrifamáttur myndarinnar er magnaður upp með vönduðu efnisvali og prentvinnslu.

Verk sem gerir efniviðnum hátt undir höfði svo að úr verður eigulegur gripur. Bókin er brotin upp á óvæntan máta og unnið með ólík leturkerfi og uppsetningu, og þannig skírskotað til umfjöllunarefnisins. Góð hrynjandi í umfangsmiklu verki þar sem reynir á margt í framsetningu upplýsinga.

Bókaröð þar sem himingeimurinn liggur til grundvallar. Unnið er með svarthol á kjölum bókanna, sem og á innsíðum og saurblöðum. Röðin hefur sterkan heildarbrag en hver bók hefur þó sín sérkenni. Laglegt letur og fallegt pappírsval að innan sem utan gera bækurnar góðar aflestrar.

Lesandinn sogast inn í heim bókarinnar frá fyrstu síðu. Handskrifað lesmál og úthugsað litaval hafa bein áhrif á lestrarupplifunina og kallast á við efni bókarinnar. Pappírinn passar teikningunum fullkomlega og grunnsýn höfundar er fylgt út í gegn þannig að úr verður sannfærandi og heilsteypt verk.

Úthugsað og stílhreint verk þar sem efnisval, prentun og myndvinnsla er til fyrirmyndar. Kápa og innsíður endurspegla verkin sem eru til umfjöllunar og samræmi er milli allra hönnunarþátta. Óhefðbundin týpógrafía sem þó lætur lítið fyrir sér fara.

Gáskafullt bókverk þar sem leikgleði ræður ferðinni. Marglaga kápa sem endurspeglar umfjöllunarefnið á óvæntan hátt. Verk sem sprengir upp hugmyndir um form og flokka. Vel farið með teikningar og myndvinnslu þannig að áferð og pappír skila sér.

Framúrskarandi bókverk þar sem hvert smáatriði er úthugsað. Prentun, pappírsval og myndvinnsla draga myndir bókarinnar fram og svartur saumurinn bindur efnið og bókverkið í órofa heild.