Umsögn AÍ um frumvarp til laga um breytingu á lögum um listamannalaun

Í lok nóvember óskaði alþingi eftir umsögnum um nýtt frumvarp til laga um breytingu á lögum um listamannalaun, nr. 57/2009 (tímabundin fjölgun starfslauna og styrkja), 310. mál. Þetta frumvarp fjallaði um sérráðstöfun vegna Covid sem kemur til framkvæmda árið 2021.  Mennta-og menningarmálaráðuneyti í samráði við Bandalag íslenskra listamanna er jafnt þessu að vinna að heildarendurskoðun listamannalaun til lengri tíma en ráðuneytið er nú orðið meðvitaðra um takmarkað aðgengi hönnuða og arkitekta að þessum sjóði. Það er því gríðarlega mikilvægt fyrir arkitekta og hönnuði að bregðast við erindum sem þessum og senda inn umsögn til þess að gagnrýna fyrirkomulagið eins og það er í dag.

Halla Helgadóttir, framkvæmdastjóri Miðstöðvar hönnunar og arkitektúrs, hvatti öll fagfélög Miðstöðvarinnar að bregðast við og senda inn umsögn. Arkitektafélag Íslands skipaði strax vinnuhóp til að vinna umsögn um málið en í honum sátu Hildur Steindórsdóttir (hópstjóri), Hólmfríður Ósman Jónsdóttir og Sigríður Maack. Hildur, Hólmfríður og Sigríður voru fljótar að bregðast við og sendu strax inn umsögn um málið. Í kjölfar umsagnarinnar kallaði alsherjarnefnd-og menntamálanefnd Arkitektafélag Íslands, Fatahönnunarfélag Íslands, Miðstöð hönnunar og arkitektúrs, Félag vöru- og iðnhönnuða og Félag íslenskra teiknara á fund til að koma sjónarmiðum sínum frekar áleiðis sem er fagnaðarefni. Sá fundur var haldinn í dag, 3. desember, og voru Hildur Steinþórsdóttir og Halla Helgadóttir fulltrúar ofangreindra fagfélaga. Sá fundur gekk vel og verður spennandi að fylgjast með gangi mála.

Við fögnum því hvað félagsmenn eru öflugir talsmenn stéttarinnar og til í að gefa tíma sinn stéttinni allri til heilla.