Vettvangsferð í Fjallaböðin í Þjórsárdal

Miðvikudaginn 21. október býður BYKO félagsmönnum* Arkitektafélags Íslands í vettvangsferð í Fjallaböðin í Þjórsárdal.

Fjallaböðin eru hluti af metnaðarfullri uppbyggingu í Þjórsárdal þar sem náttúra, arkitektúr og upplifun fléttast saman. Í ferðinni gefst félagsmönnum einstakt tækifæri til að kynnast verkefninu frá fyrstu hugmyndum og framtíðarsýn yfir í hönnun og þá framkvæmd sem nú stendur yfir.

Í ferðinni verður verkefnið kynnt frá ólíkum sjónarhornum. Fulltrúar Bláa Lónsins segja frá tilurð og framtíðarsýn verkefnisins, Marcos Zotes hjá Basalt Arkitektum fjallar um hönnunina og framkvæmdaraðilar segja frá uppbyggingu og helstu áskorunum á verkstað.

Lagt verður af stað með rútu frá BYKO timburverslun Skemmuvegi 2a á slaginu 9:00 og ekið að Hrauneyjum. Þar verður tekið á móti hópnum með hádegisverði og boðið upp á kynningar þar sem verkefnið verður skoðað frá ólíkum sjónarhornum.

Að kynningum loknum verður haldið á framkvæmdasvæðið sjálft þar sem þátttakendur fá leiðsögn um Fjallaböðin og tækifæri til að sjá verkefnið taka á sig mynd. Áætluð heimkoma á höfuðborgarsvæðið er um 18:00.

Aðeins 54 sæti eru í boði og því hvetjum við áhugasama félagsmenn til að skrá sig sem fyrst.

Skráning er nauðsynleg.

*Fullgildir félagsmenn fá forgang í ferðina. Nemar sem eru í félaginu geta skráð sig og eru þá settir á biðlista.