Við færum ykkur blóm

Í tilefni af endurgerð Mjólkursamsölunnar á blómafernum Kristínar Þorkelsdóttur, Stephens Fairbarn og Tryggva Tryggvasonar er búið að endurvekja eldhús níunda áratugarins í Grósku. Jökull Jónsson, arkitket og Tanja Levý fata-, búninga- og textílhönnuður eiga heiðurinn af innsetningunni sem verður opinn allan HönnunarMars við aðalinngang Grósku. 

Þar  má finna úrval af  íslenskri klassík á borð við barstóla frá Stáliðjunni en jafnframt líflega hönnun Guðrúnar Margrétar Ólafsdóttur í Go Form, svo ekki sé minnst á mjólkurfernurnar og aðrar vörur Mjólkursamsölunnar sem vekja upp nostalgíutilfinningu. 

Lítið kaffiboð var haldið í Grósku til að fagna endurgerð blómafernanna með hönnuðum í innsetningunni þar sem þeim Kristínu og Stephen var meðal annars færð blóm frá teymi HönnunarMars og MS. 

Rýmið verður opið allan HönnunarMars í Grósku og hvetjum við gesti og gangandi til að koma við og upplifa afturhvarf til fortíðar.

Ólíkur bakgrunnur þeirra Jökuls og Tönju Levý smellur vel saman í verkefnum sem þessum, þar sem sameinaðir kraftar þeirra skapa áhugaverða útkomu. Saman hafa þau hannað leikmyndir og leikmuni fyrir leikhús, kvikmyndir, auglýsingar og viðburði.

Blómafernur hönnuðanna Kristínar, Tryggva og Stephen eru komnar tímabundið í verslanir og munu þær án efa vekja upp nostalgíutilfinningu hjá mörgum. Blómafernurnar, skreyttar með myndefni eftir Eggert Pétursson úr bókinni Íslensk flóra með litmyndum, komu upphaflega á markað árið 1985 þar sem Mjólkursamsalan vildi gefa neytendum blóm í tilefni af 50 ára afmæli fyrirtækisins. Lestu meira hér.

Hér má sjá ljósmyndir frá Aldísi Pálsdóttur.