Dagskrá HönnunarMars hefst opinberlega á morgun en nokkrar sýningar taka forskot á sæluna og halda opnunarhóf í dag. 

Dagskrá hátíðarinnar dreifist um alla borg næstu daga. Leikgleði og forvitini eru einkennandi í ár en viðfangsefnin eru m.a. samskipti, framtíðarsýn, örverur, fuglar, sjálfbærni, heilsa og náttúra. Hér að neðan eru þeir viðburðir sem fara fram í dag en dagskránna í heild má finna hér.

Slippbarinn á Icelandair hótel Reykjavík Marina verður sérstakur hátíðarbar HönnunarMars 2022. HönnunarMars kokteill verður á tilboði á barnum og stuttmynd Icelandair,Why not? Designing the Spirit of Iceland,verður sýnd í Slippbíó, bíósal Slippbarsins frá og með deginum í dag. 

Bókin „Laugavegur“ kom út fyrir jólin 2021 á vegum bókaforlagsins Angústúru. Í henni er byggingar- og verslunarsaga aðalgötunnar sögð í máli og myndum og tilraun gerð til að útskýra hvers vegna Laugavegurinn hefur þróast með þeim hætti sem raun ber vitni. Finna má fróðleik um yfir hundrað húsnúmer við Bankastræti og Laugaveg. Fjallað er um þróun borgarrýmisins og húsin sem eru, voru og ekki urðu. Á HönnunarMars sýna höfundar bókarinnar teikningar og ljósmyndir úr bókinni í Epal - Laugavegi, en aðaláherslan verður á efni sem Guðni gerði sérstaklega fyrir bókina en rataði ekki í endanlega útfærslu hennar. Opnunarhóf verður haldið í dag á milli kl. 16:00 og 18:00

Opnun á verkinu Sýndarsund eftir Hrund Atladóttur verður í dag frá kl. 17:00 – 19:00 í Hönnunarsafninu. Verkið opnar í samhengi við sýninguna SUND en hún nær yfir tímabilið frá sundvakningunni við upphaf 20. aldar til dagsins í dag. Sagan sem hún segir af sundlaugamenningu er um leið ylvolg sagan af íslensku nútímasamfélagi með léttri angan af klór og hveralykt, gufuslæðu og skvampi.

Agnes Freyja Björnsdóttir, Silvía Sif Ólafsdóttir og Sylvía Dröfn Jónsdóttir útskrifuðust úr vöruhönnun frá LHI árið 2020. Það sem einkennir verk þeirra eru leikur, húmor og tilraunagleði. Hópurinn kynnir tvö verkefni „Hundrað hlutir sem við heyrðum í sundi“ og „Bíbí og blabla“. Eftir þriggja mánaða vinnustofudvöl er komin tími á uppskeruhátið hjá Studio allsber. Spáum í bolla og skálum fyrir sköpunargleðinni, samverunni og auðvitað HönnunarMarsinum í Hönnunarsafninu i dag frá kl. 17:00 - 19:00.

Kirsten Geelan, sendiherra Danmörku á Íslandi, býður Kent Martinussen (DK) og Höllu Helgadóttur (IS) til sín fyrir áhugavert síðdegi með samtali um hönnun frá kl. 16:00 - 18:00.

Kent Martinussen (DK) er danskur arkitekt og framkvæmdastjóri Miðstöðvar arkitektúrs í Danmörku. Kent hefur rekið sína eigin teiknistofu samhliða því að sinna kennslu og rannsóknum við háskóla í Danmörku sem og erlendis. Kent hefur komið að fjölmörgum erlendum verkefnum, m.a. Arkitektatvíæringum í Feneyjum og þríæringi, bæði í Japan og Mið-Austurlöndum. Hann hefur setið í stjórn Danska arkitektafélagsins og í stjórn the DAC, Danish Cultural Canon, sem vinnur að því að skilgreina og útnefna danskan menningararf. 

Halla Helgadóttir (IS), framkvæmdastjóri Miðstöðvar hönnunar og arkitektúrs, er með víðtæka reynslu sem hönnuður og stjórnandi. Halla er grafískur hönnuður að mennt, heiðursfélagi í FÍT og starfaði í eigin fyrirtæki í 20 ár. Hún hefur stofnað til og tekið þátt í fjölmörgum stefnumótandi og nýskapandi verkefnum á Íslandi og erlendis og um leið öðlast þekkingu og reynslu af því að vinna þvert á starfgreinar hönnunar og arkitektúrs, með fyrirtækjum og stjórnvöldum og á sviði skapandi greina.

Hvernig liti heimurinn út ef tíska væri fullkomlega sjálfbær? Hvernig geta hringrásarlausnir eflt íslenska hönnun?

Fataleigan SPJARA býður almenningi að virkja sköpunargleðina og taka þátt í að móta framtíðarsýn fyrir sjálfbæra framtíð íslenskrar tísku á samhönnunar (co-design) viðburði SPJARA. Á POP-UP leigu SPJARA býðst gestum einnig að klæða sig upp og leigja sér sparifatnað yfir hátíðina. Boðið verður upp á nýjar og notaðar hönnunarflíkur en sérstök áhersla verður lögð á vandaða íslenska hönnun. Opnunarhóf fer fram í dag frá kl. 17:00 - 19:00 á Loft hostel. 

HönnunarMars fer fram 4. til 8. maí um alla borg og samanstendur af yfir 100 sýningum og 200 viðburðum. 

Viðburðir fyrir umhverfið á HönnunarMars

Tískutengdir viðburðir á HönnunarMars

Viðburðir sem taka forskot á sæluna

Deila

Tögg