Þann 20. nóvember næstkomandi kemur út á vegum Sögumiðlunar bók um Þóri Baldvinsson arkitekt (1901-1986). Þórir Baldvinsson var í senn framúrstefnumaður í arkitektúr og hugsjónamaður í baráttu fyrir bættum húsakosti til sveita. Hann varð fyrstur íslenskra arkitekta til að kynna nýjar húsnæðislausnir í anda funksjónalisma og var frumkvöðull í gerð slíkra bygginga hér á landi.

Dæmi um hús Þóris eru samvinnuhúsin svokölluðu við Ásvallagötu í Reykjavík og við Helgamagrastræti á Akureyri. Þar kynnti Þórir fyrstur manna til sögunnar forskölun í húsbyggingum hér á landi. Þórir teiknaði einnig fjölmargar opinberar byggingar; héraðsskóla, kaupfélagshús, samkomuhús og verksmiðjuhús vítt og breitt um landið og þekktar byggingar í Reykjavík eins og Alþýðuhúsið við Hverfisgötu og Mjólkurstöðina við Laugaveg sem nú hýsir Þjóðskjalasafnið. Helsta starf Þóris var hinsvegar að veita Teiknistofu landbúnaðarins forstöðu á árunum 1938-1969. Þáttur hans í nútímavæðingu sveitanna var gríðarstór, bættur húsakostur sem hélst í hendur við vélvæðingu. Hér gefur að líta í fyrsta sinn yfirlit verka Þóris ásamt æviágripi hans. Ólafur J. Engilbertsson ritstýrir bókinni en auk hans skrifa greinar Árni Daníel Júlíusson, Jóhannes Þórðarson, Ólafur Mathiesen og Pétur H. Ármannsson sem jafnframt tekur saman verkaskrá Þóris. Úlfur Kolka sér um útlit bókarinnar en hana prýðir fjöldi ljósmynda og teikninga.

Hægt er að panta bókina í forsölu með því að senda tölvupóst á ritstjóra bókinnar, Ólaf Jóhann Engilbertsson hjá Sögumiðlun, á netfangið: olafur@sogumidlun.is. Forsöluverð bókarinnar er 7.290 kr en fullt verð bókarinnar er 9.900 kr. 

Heiðursverðlaunahafi Hönnunarverðlauna Íslands árið 2021 er Gunnar Magnússon, húsgagnahönnuður og innanhússarkitekt

Samtal um framtíð byggða á hönnun, hugviti og nýsköpun

Helga Valfells og Andri Snær Magnason taka sæti í stjórn Miðstöðvar hönnunar og arkitektúrs

Þórir Baldvinsson arkitekt | Ný bók um framúrstefnumanninn og funksjónalistann

Deila

Tögg