Bókin Kristín Þorkelsdóttir er komin út
![](https://images.prismic.io/midstod-honnunar-og-arkitekturs/9a1c2a77-cf54-4c9f-884c-3862a47a9517_Kristi%CC%81n+%C3%9Eorkelsdo%CC%81ttir.jpg?auto=compress,format&rect=0,0,1886,2400&w=1620&h=2062)
Bókin Kristín Þorkelsdóttir er komin út en þar varpa þær Bryndís Björgvinsdóttir og Birna Geirfinnsdóttir ljósi á fjölmörg verk Kristínar og þeirra óskráðu sögu.
Kristín er grafískur hönnuður, handhafi Heiðursverðlauna Hönnunarverðlauna Íslands 2020 og óhætt að segja að hér á landi hafi fáir skilað jafn mörgum þekktum verkum, sem skipa viðlíka sess í íslenskri sjónmenningu.
Bókin er gefin út af Angústúru, innbundin, 240 bls og er bókarhönnun í höndunum á Studio Studio (Arnar Freyr Guðmundsson, Birna Geirfinnsdóttir). Bryndís og Birna starfa báðar sem dósentar við hönnunardeild Listaháskóla Íslands.
Kristín (1936) hóf að vinna fyrir sér sem teiknari og grafískur hönnuður á unglingsaldri. Allar götur síðan hafa verk hennar verið áberandi hluti af íslensku hversdagslífi, svo sem þegar ísskápur er opnaður, veski er dregið fram í verslun eða sest er við borðhald. Á löngum ferli hefur Kristín hannað urmul auglýsinga, minnistæðra umbúða og rótgróin merki, sem hafa verið landsmönnum sýnileg á skiltum, pappír og skjáum í yfir fimm áratugi. Kristín stofnaði og rak um árabil eina mikilvirtustu auglýsingastofu landsins þar sem hún leiddi alla hönnunarvinnu, til að mynda á mjólkurfernum fyrir Mjólkursamsöluna, umbúðum Osta- og smjörsölunnar og sjónvarpsauglýsingar fyrir BYKO. Kristín teiknaði einnig merki þessara fyrirtækja og annarra og hafa sum þeirra verið í notkun í áratugi. Þá sinnti hún hönnun þeirra peningaseðla sem nú eru í notkun hérlendis og íslenska vegabréfinu.
![](https://images.prismic.io/midstod-honnunar-og-arkitekturs/1797ea4e-adde-41b0-8fa0-7355589bdebf_Kristi%CC%81n+%C3%9Eorkelsdo%CC%81ttir+2.png?auto=compress,format)
![](https://images.prismic.io/midstod-honnunar-og-arkitekturs/dad232dd-b052-4218-95e9-8c459002c358_Kristi%CC%81n+%C3%9Eorkelsdo%CC%81ttir+3+.png?auto=compress,format)