Dögg & Dýpi – í samtali við náttúruna á 3daysofdesign
Dögg og Dýpi verða með sýninguna Mitt á milli í íslenska sendiráðinu í Kaupmannahöfn á dönsku hönnunarhátíðinni 3daysofdesign sem fer fram dagana 10-12. júní.
Mitt á milli er sýningin á verkum íslenska hönnuðarins Dögg, sem öll hafa sterka tengingu við náttúru og tíma.Hvert verk geymir sögu af stað, manneskju, efni eða augnabliki í tíma. Hlutir umbreytast, skapa rými fyrir leik, varðveita minningar og fylgja okkur í gegnum ólík skeið lífsins – frá bernsku til fullorðinsára, frá upphafi til enda. Þá endurspegla verkin aukna áherslu á sjálfbærni, ekki aðeins í efnisnotkun heldur einnig í félagslegu og tilfinningalegu gildi. Náttúran er ekki aðeins innblástur, heldur hluti af eðli verkanna og yfirborði sýningar sem unnin verður með náttúrulegri kalkmálningu úr íslenskum þörungum frá Dýpi, framleiddri úr kalkþörungum sem safnað er í Arnarfirði á Íslandi.
Á sýningunni verða bæði ný og nýleg verk eftir Dögg Guðmundsdóttur, sem ýmist voru unnin fyrir Snedkerens Efterårsudstilling, sem er 45 ára gömul rótgróin hönnunarsýning haldin árlega með fókus á samvinnu milli hönnuðar og smiðs og Danmarks Næste Klassiker, sem er danskur raunveruleikaþáttur um húsgagnahönnun þar sem hönnuðir keppa um að skapa húsgögn sem geta orðið dönsk hönnunarklassík.
Dýpi hófst sem frumkvöðlaverkefni, þróað af þeim Sirrý Ágústsdóttur, frumkvöðli og Árnýju Þórarinsdóttur, arkitekt og er fyrsta íslenska kalkmálninginn sem unnin er úr vottuðu sjávarkalki. Málningin andar einstaklega vel, er umhverfisvæn, plastlaus og frábært dæmi um hvernig nýta má náttúrulegt hráefni sem fellur til í miklu magni með nýskapandi hætti. Dýpi var tilnefnt til Hönnunarverðlauna Íslands 2025.
Sýningarstjóri er Ólöf Rut Stefánsdóttir, þverfaglegur skapandi stjórnandi sem starfar á sviði hönnunar, viðburða og miðlunar. Hún hefur í gegnum árin unnið með fjölmörgum hönnuðum og listamönnum og frá árinu 2020 hefur hún verið stjórnandi í Ásmundarsalar, menningarhúss í Reykjavík.
Þetta er í fjórða sinn sem Miðstöð hönnunar og arkitektúrs tekur þátt í 3daysofdesign í samstarfi við íslenska sendiráðið í Danmörku og Íslandsstofu.
Opnunarhóf: Miðvikudaginn 10. júní kl. 16.30 - 18.30.
Heimilisfang: Strandgade 89, 1401 København
Vinsamlegast skráðu þig hér.
