Hlöðuberg tilnefnt sem staður ársins - Hönnunarverðlaun Íslands 2023
![](https://images.prismic.io/midstod-honnunar-og-arkitekturs/dd7cdc6c-a713-4021-86a9-021af71187c8_Hlo%CC%88%C3%B0uberg.png?auto=compress,format&rect=0,0,2500,1332&w=1620&h=863)
Hlöðuberg eftir Studio Bua er tilnefnt í flokknum staður ársins á Hönnunarverðlaunum Íslands 2023.
Rökstuðningur dómnefndar:
Hlöðuberg er einstakt heimili og vinnustofa listamanns á Skarðsströnd við Breiðafjörð. Húsið er hannað með virðingu fyrir sögu, staðaranda, náttúru og umhverfi að leiðarljósi. Forsendur hönnunarinnar skína í gegnum allar lausnir í verkinu, svo úr verður hús með skýr útlitseinkenni sem skapar einstakan staðaranda. Endurnýting og hagkvæmnisjónarmið ráða öllu efnisvali, en verkefnið er mjög í anda nýjustu strauma í arkitektúr og byggingarlist þar sem endurnýting efna og umhverfissjónarmið eru allsráðandi.
Arkitektastofan Studio Bua endurhannaði steinsteypta hlöðu í bjart og nútímalegt heimili og vinnustofu á Hlöðubergi. Form hússins er bárujárnsklæddur skáli sem stendur á upprunalegri steinsteyptri neðri hæð. Einkennandi fyrir verkið er að veggir gamallar hlöðu hafa verið endurnýttir og efri hæð er byggð ofan á þá. Innra skipulag er einfalt, stílhreint og haganlega leyst svo úr verða fjölbreytt rými og hús sem er stærra að innan en það virðist að utan.
Um:
Studio Bua er arkitektastofa staðsett í London stofnuð árið 2017 af arkitektunum Sigrúnu Sumarliðadóttur og Mark Smyth. Stofan hefur unnið að fjölbreyttum metnaðarfullum verkefnum á sviði arkitektúrs.
Hönnunarverðlaun Íslands varpa ljósi á mikilvægi og gæði hönnunar og arkitektúrs á Íslandi með áherslu á áhrif þeirra á lífsgæði, verðmætasköpun og sjálfbærni fyrir samfélagið allt. Þau verða veitt í tíunda sinn í ár (2023) og í tilefni af því hefur verðlaunaflokkum verið fjölgað í þrjá undir heitunum Verk // Staður // Vara.
Dómnefnd tilnefnir þrjú verkefni í hverjum flokki og af þeim hlýtur einn sigurvegari í hverjum flokki Hönnunarverðlaun Íslands 2023 sem eru hvor tveggja heiðurs- og peningaverðlaun. Auk þess verður veitt viðurkenning fyrir bestu fjárfestingu í hönnun og Heiðursverðlaun Hönnunarverðlauna Íslands.
Það er Miðstöð hönnunar og arkitektúrs sem stendur að verðlaununum, í samstarfi við Hönnunarsafn Íslands, Listaháskóla Íslands, Íslandsstofu og Samtök iðnaðarins.
![](https://images.prismic.io/midstod-honnunar-og-arkitekturs/dfe278c0-0fa1-4dd2-8667-345ee832b194__DSF7986.jpg?auto=compress,format)
![](https://images.prismic.io/midstod-honnunar-og-arkitekturs/4259b8a2-6870-4212-a6e4-fa010f111d56__DSF8088.jpg?auto=compress,format)
![](https://images.prismic.io/midstod-honnunar-og-arkitekturs/44455cf1-a980-485d-a29e-a0adc43c5362__DSF7126.jpg?auto=compress,format)
![](https://images.prismic.io/midstod-honnunar-og-arkitekturs/d6267ecd-62d0-463d-b382-4385923fddf9__DSF7817.jpg?auto=compress,format)
![](https://images.prismic.io/midstod-honnunar-og-arkitekturs/93610921-1f72-407d-aea4-f095437691b0__DSF7376.jpg?auto=compress,format)
![](https://images.prismic.io/midstod-honnunar-og-arkitekturs/60dede97-209c-4577-9905-d6ab6628ba37__DSF7233.jpg?auto=compress,format)
![](https://images.prismic.io/midstod-honnunar-og-arkitekturs/cb7f7ea7-9c52-4bc0-97bc-eb77bbad48e6__DSF7467.jpg?auto=compress,format)
![](https://images.prismic.io/midstod-honnunar-og-arkitekturs/b17a22e0-029f-464a-b5f7-276450103009__DSF7610.jpg?auto=compress,format)