Loksins aftur DesignTalks!

20. maí 2022

Alþjóðlega ráðstefnan og lykilviðburður HönnunarMars, DesignTalks, fór fram fyrir fullu húsi í Hörpu þann 4. maí og opnaði þar með hátíðarhöld HönnunarMars. Leiðtogar víðsvegar að á sviði hönnunar og arkitektúrs stigu á svið og veittu gestum innblástur út árið. 

DesignTalks hefur að gefnu tilefni ekki verið á dagskrá hátíðarinnar síðustu tvö ár og var því kærkomið að geta haldið ráðstefnuna og opnað hið alþjóðlega samtal á nýjan leik eftir heimsfaraldur. 

DesignTalks 2022 var undir listrænni stjórn Hlínar Helgu Guðlaugsdóttur og umræðum dagsins stjórnaði Marcus Fairs, stofnandi og ritstjóri Dezeen. Kynnir var fjölmiðlakonan Guðrún Sóley Gestsdóttir. 

Dagskráin veitti gestum innblástur inn í nýja tíma frá skapandi hugsuðum og framtíðarrýnum sem vörpuðu ljósi á hvernig hönnun og arkitektúr geta tekið þátt í uppbyggingu og framþróun og verið hreyfiafl breytinga. 

Meðal þeirra sem komu fram voru Michael Pawlyn, frumkvöðull á sviði biomimicry og regenerative arkitektúrs, hönnuðurnir og listamennirnir Aamu Song og Johan Olin, stofnendur  COMPANY, sem reka Salakauppa (Leynibúðina) í Helsinki, sköpunarstjórinn og mynsturhönnuðurinn Gabriela Sánchez y Sánchez de la Barquera, Anders Lendager, frumkvöðull í sjálfbærni og meðstofnandi arkitektastofunnar Lendager group, Tor Inge Hjemdal, framkvæmdastjóri DOGA, Stefán Laxness, arkitekt, fræði- og listamaður, áður starfandi hjá Forensic Architecture, Giorgia Lupi, upplýsingahönnuður og meðeigandi Pentagram, stafræni fatahönnuðurinn Susanne Vos hjá The Fabricant, Valdís Steinarsdóttir, hönnuður og Liam Young, margverðlaunaður sci-fi arkitekt, leikstjóri og framleiðandi.

Hér má sjá myndir frá DesignTalks frá Aldísi Pálsdóttur 

Dagsetning
20. maí 2022
Höfundur
Álfrún Pálsdóttir

Tögg

  • Greinar
  • HönnunaMars