Síbreytilegur og sveigjanlegur rammi
—
Ástþór Helgason og Studio Studio

Viðtalið birtist fyrst í HA Extra fyrir HönnunarMars, 2019.

Ástþór Helgason, nýr stjórnandi HönnunarMars, hefur haft í nógu að snúast undanfarið við að móta heildstæða hátíð með nýrri sýn – og fersku útliti úr smiðju Studio Studio.

Hvaða hlutverki gegnir HönnunarMars fyrir íslenskt samfélag?

HönnunarMars er í sífelldri þróun og hefur fest rækilega í sessi sem uppskeruhátíð íslenskrar hönnunar og arkitektúrs. Hátíðin hefur átt ríkan þátt í að breyta landslagi hönnunar og því skynbragði sem fólk ber á hana. Þessi þróun er í takt við þá staðreynd að hönnun og arkitektúr gegnir sífellt mikilvægara hlutverki í samfélaginu – enda er hönnunarhugsun eitt verðmætasta verkfærið sem við eigum til að auka lífsgæði og velsæld. Svo komum við auðvitað saman til að gleðjast, mynda tengsl og finna hugmyndum okkar farveg.

Hvað einkennir hátíðina í ár?

Fjölbreytileiki – sjálfbærni og lausnamiðuð framtíðarhugsun eru ríkjandi stef í dagskrá hátíðarinnar. Á DesignTalks, alþjóðlegu hönnunarráðstefnunni, eru slík verkefni í forgrunni. Þar verður fjallað um hvernig breyta megi heiminum til hins betra, hvar fari saman áhugaverðar breytingar og árangursríkar lausnir á erfiðum málum. Hátíðin í heild sinni endurspeglar að hönnun teygir sig nú inn á flest svið samfélagsins – til að mynda í öllum ferlum, framleiðslu og skipulagi.

Studio Studio, grafísku hönnuðirnir Arnar Freyr Guðmundsson og Birna Geirfinnsdóttir, hanna nýtt einkenni HönnunarMars.

Hvernig kviknaði hugmyndin að útliti hátíðarinnar og hverju viljið þið koma til skila?

Nýja einkennið byggir á því eldra – sem endurspeglar ákveðið ferli, framsækni og sérstöðu. Við settum stefnuna á að móta sterkt einkenni með afmörkuðum ramma sem býður upp á sveigjanleika. Hann má svo laga að ólíkum miðlum sem gerir einkennið í raun síbreytilegt. Líkt og áður er teflt fram jákvæðu yfirbragði og tilraunagleði og fjólublái liturinn verður áfram í forgrunni. Stór hluti nýja einkennisins er íslenskt letur sem hannað er af Universal Thirst. Skilaboðin eru nokkuð óræð en með skýrt markmið – að vekja áleitnar spurningar um hlutverk hönnuða og hönnunar í samfélaginu.