Hver hlýtur Steinsteypuverðlaunin 2024? Ábendingar óskast

23. nóvember 2023
Vök Baths, Basalt arkitektar, vinningshafar Steinsteypuverðlaunanna 2023

Steinsteypufélag Íslands óskar eftir ábendingum til Steinsteypuverðlaunanna 2024. Óskað er eftir því að ábendingar berist félaginu fyrir 28. desember 2023 en Steinsteypuverðlaunin verða veitt á Steinsteypudaginn, þann 2. febrúar 2024. Veitt verður viðurkenning fyrir mannvirki á Íslandi þar sem saman fer áhugaverð og vönduð notkun á steinsteypu í manngerðu umhverfi.

Steinsteypufélag Íslands leitast stöðugt við að vekja athygli á mikilvægi steinsteypu í umhverfi okkar, enda er steinsteypa eitt helsta byggingarefni Íslendinga. Stjórn Steinsteypufélags Íslands hefur ákveðið að velja steinsteypt mannvirki ársins árið 2024.

Við valið verður haft að leiðarljósi að mannvirkið:

  • Sýni steinsteypu á áberandi hátt.
  • Sé framúrskarandi vegna arkitektúrs, verkfræðilegra lausna, gæði steinsteypu og handverks.
  • Búi yfir frumleika og endurspegli þekkingu í meðferð og notkun steinsteypu. Gæði og áferð steinsteypu vega þungt í mati.
  • Auðgi umhverfið, inniberi gæði, glæsileik og nytsemi og sýni augljósan metnað í samhengi við umhverfi sitt.
  • Sé byggt á síðustu fimm árum og í notkun.

Viðurkenningin verður veitt mannvirkinu og þeim aðilum sem að því standa, svo sem verkkaupa, hönnuðum og framkvæmdaaðilum.

Leitað er eftir ábendingum frá verk-, tækni- og byggingafræðingum, arkitektum, listamönnum og iðnaðarmönnum og frá skipulags- og bygginganefndum. Óskað er eftir því að ábendingar berist félaginu fyrir 28. desember 2023.

Þeim fylgi eftirtalin gögn:

  • heiti mannvirkis, staðsetning og eigandi
  • verkkaupi
  • hönnunarteymi
  • framkvæmdaaðili- og framkvæmdaár
  • hvenær tekið í notkun
  • stutt lýsing á mannvirki, kennistærðir og hlutverk steinsteypu
  • ljósmyndir og, ef vill, myndbönd (teikningar óþarfar)

Tillögur og fyrirspurnir skulu sendast á netfang félagsins: steinsteypufelag@steinsteypufelag.is

Stjórn Steinsteypufélags Íslands áskilur sér rétt til að meta mannvirki á innsendum gögnum sem og að óska eftir frekari upplýsingum um verkið. Stjórn Steinsteypufélags Íslands

Dagsetning
23. nóvember 2023
Höfundur
Gerður Jónsdóttir

Tögg

  • Arkitektúr
  • Verðlaun