Þvörusleikir síðastur til byggða í jólaóróasafni Styrktarfélags lamaðra og fatlaðra
Þvörusleikir er jólaórói Styrktarfélags lamaðra og fatlaðra 2021. Hönnunarteymið Arnar&Arnar hannaði óróann og Kristín Svava Tómasdóttir samdi kvæði um kappann. Þvörusleikir er síðastur í jólaóróaseríunni sem telur alls sextán óróa.
Jólasveinarnir þrettán hafa verið færðir í stál ásamt Grýlu, Leppalúða og Jólakettinum. Markmiðið með gerð og sölu jólaóróanna er að auðga líf fatlaðra barna og ungmenna en allur ágóði af sölunni rennur óskiptur til Æfingastöðvarinnar sem Styrktarfélagið á og rekur. Á Æfingastöðinni fá börn og ungmenni með frávik í hreyfingum og þroska iðju- og sjúkraþjálfun. Þjónustan er fyrir öll börn og ungmenni sem þurfa aðstoð við að bæta færni sína í leik og starfi svo þau geti þroskast, dafnað og notið lífsins.
Hönnuðir og skáld hafa lagt verkefninu lið og gefið vinnu sína við að skapa jólaóróana og semja kvæði. Kertasníkir var fyrstur í röðinni en hann kom út fyrir jólin 2003. Jólaóróinn er framleiddur í takmörkuðu upplagi. Hægt er að nálgast eldri óróa hér.
Sala Þvörusleikis fer fram í gjafavöruverslunum um land allt dagana 2. - 16. desember og í netverslun Styrktarfélags lamaðra og fatlaðra
Þvörusleikir
Þú dormar undir sænginni svífandi
milli svefnsins og vökunnar
ilmandi strokin og hrein
flekklaus
eins og fyrirætlanir þínar
þú hefur málað stórar myndir
af lífinu eins og það verður
þegar þú verður betri
þegar þú verður góð
af lífinu þegar það verður fallegt
en þú getur ekki sofnað
fyrir annarri mynd
ágengri og lokkandi mynd
af eldhúsinu þar sem enginn gætir
pottsins og þvörunnar
með heiðarlegum hælkrók
glímir þú við hann
svo hrindingum og spörkum
en aldrei er þessi órólegi hugur
óskiptur
Hann rumskar í myrkrinu
myrkur sjálfur
vekjari syndanna
rifa á auga
væta í munni
þú hefur reynt að skilja
á milli þín og hans
temja skepnuna
vernda þetta smáa
og berskjaldaða líf undir lágu þaki
hann lætur ekki segjast
hann gerir usla
aflið í þér
þvengurinn og þvaran
þagnar ekki
uns þú rankar við þér
standandi yfir pottunum
með puttana á kafi í graut
með þvöruna uppi í þér
skepnan ótamin
Kristín Svava Tómasdóttir
Arnar&Arnar
Arnar Fells Gunnarsson og Arnar Ingi Viðarsson hafa starfað sem einn maður í teyminu Arnar&Arnar um árabil eða allt frá því að þeir unnu ótrúlegan sigur á tvíliðaleiksmóti í skvassi árið 2008. Þeir unnu lengi með Hönnunarmiðstöð og stofnuðu tímaritið HA Design Magazine. Arnar&Arnar reka nú hönnunarstofu og sérhæfa sig í mörkun og upplifunarhönnun. Arnar Ingi lauk gráðu í listrænni stjórnun frá IED Istituto Europeo di Design skólanum í Barcelona árið 2012. Arnar Fells útskrifaðist með BA-gráðu í grafískri hönnun frá Listaháskólanum árið 2013 og lauk MBA-námi frá Háskólanum í Reykjavík árið 2020. Tvíeykið hefur vakið verðskuldaða athygli fyrir hönnun sína og þeir hafa meðal annars hlotið gullverðlaun FÍT fyrir hönnun bókarinnar Gjöfin til íslenskrar alþýðu.
Kristín Svava Tómasdóttir
Kristín Svava Tómasdóttir hefur tekið virkan þátt í íslensku ljóðalífi frá unga aldri. Hún hefur sent frá sér fjórar ljóðabækur, síðast Hetjusögur sem hlaut Fjöruverðlaunin árið 2020. Bók hennar Stormviðvörun kom út í Bandaríkjunum undir titlinum Stormwarning árið 2018 en fyrir hana var þýðandinn K.B. Thors tilnefnd til bandarísku PEN-verðlaunanna í flokki þýddra ljóðabóka. Kristín Svava var einn af ritstjórum ljóðabókaseríunnar Meðgönguljóða. Haustið 2021 gegndi hún starfi Jónasar Hallgrímssonar í ritlist við Háskóla Íslands.
Kristín Svava er með MA-próf í sagnfræði frá Háskóla Íslands. Auk ljóðabókanna hefur hún sent frá sér sagnfræðiverkið Stund klámsins: Klám á Íslandi á tímum kynlífsbyltingarinnar, sem hlaut Viðurkenningu Hagþenkis árið 2018, og hún er einn af höfundum bókarinnar Konur sem kjósa: Aldarsaga sem hlaut Fjöruverðlaunin í flokki fræðirita árið 2020 og var tilnefnd til Hönnunarverðlauna Íslands 2021.
