Indriði Guðmundsson

Indriði var mikill talsmaður fatahönnunarverðlauna á Íslandi. Honum þótti mikilvægt að félagið ætti sína eigin uppskeruhátið þar sem félgsmenn hittust, ræddu málin og fögnuðu saman.

Indriði var fagmaður fram í fingurgóma og helgaði sig leitinni að hinu fullkomna sniði. Hann lagði gríðarlega áherslu á gæði og fagmennsku og eins og hann lýsti sjálfur seldi hann ekki skyrtur, heldur uppáhaldsskyrtur. Hann sagðist leitast við að gera fullkomnar flíkur, fjöldaframleiddi eftir gömlum aðferðum og bar mikla virðingu fyrir handverkinu ásamt sköpunarferlinu sjálfu.

Indriði lagði auk þess mikið upp úr efnisvali. Gott dæmi um það eru bindin hans, en hann framleiddi 14 tegundir af svörtum bindum og lá munurinn á þeim í vefnaðinum.​

Ferill Indriða

Indriði kenndi klæðskurð við Iðnskólann í Reykjavík árin 1994-2000 og síðar við Listaháskóla Íslands. Árið 1995 fór hann til Dublin og nam hjá Des Leech, heldri manna klæðskera, en þar skrifaði hann kennslubók í efnisfræðum. Á þessum árum vann hann einnig sem klæðskeri fyrir kvikmyndir eins og Bíódaga, Djöflaeyjuna og Benjamín dúfu ásamt búningagerð fyrir Þjóðleikhúsið, leikhópinn Augnablik og Hinn Íslenska dansflokk.

Árið 2000 hóf Indriði störf sem sjálfstætt starfandi sniðagerðarmaður fyrir íslenska hönnuði og verslanir. Má þar nefna Spakmannsspjarir, ELM og GK. Indriði var einn af stofnendum Fatahönnunarfélags Íslands.

Árið 2003 stofnaði Indriði verslun við Skólavörðustíg í Reykjavík. Þar verslaði hann með skyrtur og annan herrafatnað sem framleiddur var undir hans eigin nafni. Árið 2006 flutti hann verslun sína til Kaupmannahafnar og rak hana þar til hann lést þann 30. desember sama ár.

Meginmarkmið Indriðaverðlaunanna

Með verðlaununum vill Fatahönnunarfélag Íslands veita hönnuðum viðurkenningu fyrir starf sitt og framlag til íslenskrar fatahönnunar og beina ljósi að því besta sem er að gerast í íslenskri fatahönnun hverju sinni. Verðlaunin eiga að auka vitund og virðingu fyrir íslenskri fatahönnun. 

Hvatningarverðlaun Indriða

Markmið Hvatningarverðlauna er að varpa ljósi á unga og upprennandi hönnuði sem eru að hasla sér völl á sviði fatahönnunar. Indriði sjálfur hafði mikinn áhuga á að styðja slíka skapandi einstaklinga, og endurspegla verðlaunin þann drifkraft og innblástur sem einkenndi hann í eigin starfi.

Fyrirkomulag

Fimm manna dómnefnd, sem skipuð er af stjórn Fatahönnunarfélags Íslands, velur verðlaunahafann. Skilyrði er að meirihluti dómara séu hönnuðir. Dómnefndin skilar inn skriflegum niðurstöðum þar sem rök eru færð fyrir valinu.

Við val á hönnuði er litið til þeirra fatahönnuða sem eru með heilsteyptar fatalínur, hafa verið virkir ár seinustu tveim árum fyrir afhendingu verðlaunanna og þykja hafa skarað fram úr á sínu sviði. Verðlaunin eru innblásin af starfi Indriða Guðmundssonar og því eru gæði og fagmennska lykilorð við val hönnuðar, hvort sem kemur að hugmyndum eða frágangi.

Indriðaverðlaunin 2024

• Dómnefnd 2024
• Steinunn Sigurðardóttir, fatahönnuður, þjóðfræðingur, handhafi Indriðaverðlauna og formaður dómnefndar. Álfrún Pálsdóttir, kynningarstjóri Miðstöðvar hönnunar og arkitektúrs, Edda Guðmundsdóttir fatahönnuður fyrir hönd Handverks og hönnunar og Erna Einarsdóttir fatahönnuður.

Indriðaverðlaun 2024

"Dómnefnd þykir við hæfi að heiðra Katrínu Öldu Rafnsdóttir og vörumerki hennar Kalda fyrir framúrskarandi framlag sitt til íslenskrar hönnunarsenu. Kalda hefur ávallt verið leiðandi og óhrætt við að ögra hefðbundinni fagurfræði. Katrín Alda hefur með sínum hugmyndum byggt brú á milli listfengi og notagildis, skapað vörur sem ná til fjölbreyttra hópa bæði innanlands og á alþjóðavísu. Hugmyndafræði hennar um hægfara tísku, þar sem gæði, ábyrgð og ending eru í forgrunni, endurspeglar djúpa virðingu fyrir handverkinu og menningunni sem það byggir á. Í aldaþræði handverksins finnum við uppruna skófatnaðarins, þar sem hver einasta saumur og skurður endurspeglar vandvirkni og natni. Trémótið, hinn eilífi grunnur hvers skópars, gefur honum líf, en það er síðan sjálf mannshöndin sem blæs honum anda. Þar birtist sköpunarkrafturinn, sem oftar en ekki hverfist um smáatriðin, útlitið og fegurðina. Töskur, þessir hljóðlátu félagar skónna, fylgja manneskjunni sömuleiðis. Þær eru ekki einungis hirslur fyrir nauðsynjar heldur hluti af persónulegu sviðsljósi hversdagsins. Val á tösku er ígrunduð ákvörðun, þar sem fagurfræði, notagildi og stíll þurfa að kallast á við lífshlaup einstaklingsins. Kalda er lifandi sönnun þess að íslensk hönnun á fullt erindi við heiminn."

Hvatningarverðlaun Indriða 2024

"Guðmundur Magnússon, hönnuður fyrirtækisins Vecct, hlýtur fyrstu Hvatningarverðlaunin sem veitt hafa verið hér á landi. Fyrirtæki hans sérhæfir sig í sportfatnaði og hefur strax skilað eftir sig afgerandi spor í hönnunarheiminum. Það sem gerir Guðmund einstakan er hvernig hann sameinar persónulegan áhuga sinn á hlaupaíþróttinni og fagurfræðilega nálgun í hönnun sinni. Sjálfur þjálfar hann fyrir maraþon, og þessi upplifun – krafan um þol, tækni og skarpa hugsun – skilar sér í fatnaði hans. Hönnun Vecct er sérsniðin fyrir bæði virkni og fagurfræði, þar sem smáatriði og val á efnum bera vott um sköpunargáfu og tæknilega kunnáttu. Guðmundur, sem útskrifaðist úr Listaháskóla Íslands árið 2021, hefur með elju og metnaði skarað fram úr á sviði fatahönnunar bæði fyrir og eftir nám. Með einstöku handbragði hefur hann þróað sterka og nútímalega fagurfræði, sem hefur vakið athygli bæði innanlands og erlendis."

Indriðaverðlaunin 2021

• Dómnefnd 2021
• Ekki finnast neinar upplýsingar um dómnefndina

Niðurstaða dómnefndar 2021

"Verðlaunahafi Indriðaverðlaunanna 2021 er Gunnar Hilmarsson. Hann hlýtur viðurkenninguna fyrir framúrskarandi störf og áhrif, á íslenska fatahönnun. Gunnar, eða Gunni eins og hann er jafnan kallaður, hefur starfað sem fatahönnuður í áratugi og átt þátt í að móta þá sterku stöðu sem íslensk fatahönnun býr að í dag. Hann hefur komið að fjölda áhrifamikilla fyrirtækja, meðal annars GK Reykjavík, Andersen & Lauth og Freebird. Gunni starfaði einnig um árabil erlendis fyrir þekkt tískumerki á borð við All Saints, Topshop, Bestseller og Day Birger et Mikkelsen, auk bandarísku fyrirtækjanna Anthropologie og Urban Outfitters. Síðustu átta ár hefur hann unnið með Kormáki og Skildi, þar sem verk hans hafa vakið mikla athygli og lof. Gunni er einn af stofnendum Fatahönnunarfélags Íslands og gegndi formennsku þess í mörg ár. Þá hefur hann einnig setið í stjórn Nordic Fashion Association fyrir hönd félagsins og þannig stuðlað að aukinni tengingu íslenskrar fatahönnunar við norrænt og alþjóðlegt samhengi."

​Indriðaverðlaunin 2018

• Dómnefnd 2018
• Bergþóra Guðnadóttir, hönnuður og handhafi Indriðaverðlauna 2015, Dainius Bendikas aðjúnkt í fatahönnunardeild Listaháskóla Íslands, Ellen Loftsdóttir, stílisti, Halla Helgadóttir framkvæmdastjóri Hönnunarmiðstöðvar Íslands og María Kristín Jónsdóttir ritstjóri HA.

Niðurstaða dómnefndar 2018

„Spaksmannsspjarir er rótgróið fatamerki á Íslandi sem hefur frá upphafi verið þekkt fyrir gæði og mikla fagmennsku. Flíkurnar eru tímalausar, hugmyndafræði og heildarútlit er mjög sterk og Björg hugar vel að öllum öllum smáatriðum auk þess að hafa umhverfissjónarmið að leiðarljósi.“

Indriðaverðlaunin 2015

• Dómnefnd 2015
• Erna Hreinsdóttir, ritstjóri á Nýju lífi og stílisti, Eyjólfur Pálsson, húsgagnaarkitekt, fyrir hönd Epal, Halla Helgadóttir, framkvæmdastjóri Hönnunarmiðstöðvar Íslands, Katrín María Káradóttir, fagstjóri fatahönnunardeildar Listaháskóla Íslands og verðlaunahafi Indriðaverðlaunanna 2013 og Linda Björg Árnadóttir fyrir hönd fagráðs Fatahönnunarfélags Íslands.

Niðurstaða dómnefndar 2015

"Indriðaverðlaunin eru veitt í þriðja skiptið í ár og eru þau veitt fatahönnuði sem að hefur með vinni sinni lagt áherslu á fagmennsku og vönduð vinnubrögð í anda Indriða Guðmundssonar klæðskera. Áður hafa verðlaunin verið veitt Steinunni Sigurðardóttur og Katrínu Káradóttur. Dómnefndinn komst einróma að þeirri niðurstöðu að sá/sú sem að verðlaunin skildi hljóta árið 2015 væri Bergþóra Guðnadóttir fyrir hönnun sína á fatamerkinu Framers Market."

Indriðaverðlaunin 2013

• Dómnefnd 2013
• Í dómnefnd sátu Halla Helgdóttir, Eyjólfur Pálsson, Erna Bergman, Steinunn Sigurðardóttir og Linda Björg Árnadóttir.

Niðurstaða dómnefndar 2013:

“Í ár hlýtur sá fatahönnuður Indriðaverðlaunin sem þykir hafa skarað fram úr á árunum 2011-2012. Dómnefnd komst að þeirri niðurstöðu að veita ætti Katrínu Maríu Káradóttur verðlaunin árið 2013 fyrir störf sín í faginu bæði hérlendi og erlendis, bæði fyrir hönnun og kennslu við fatahönnunardeild LHÍ.

Katrín María Káradóttir, menntaður klæðskeri og fatahönnuður, hefur í starfi sínu lagt mikla áherslu á vandaða sníðagerð, gæði, efni og frágang. Hún hefur starfað sem hönnuður fyrir erlend fyrirtæki s.s John Galliano, Lutz, Thomas Engelhart, Bali Barette og Martine Sitbon. Einnig hefur hún starfað fyrir íslensku fyrirtækin Andrea Mack og Ella en hún hefur verið yfirhönnuður Ella frá upphafi. Hún hefur starfað sem kennari við Listaháskóla Íslands í allmörg ár og er núna deildarstjóri fatahönnunardeildarinnar.

Hún hefur skilið eftir fingrafar klæðskerans á allri sinni vinnu sem einkennist af metnaði og fagmennsku.”

Indriðaverðlaunin 2011

• Dómnefnd 2011:
• Í dómnefnd sátu Halla Helgdóttir, Eyjólfur Pálsson, Anna Clausen, Valgerður Helga Schopka og Linda Björg Árnadóttir.

Niðurstöður dómnefndar 2011:

"Við val á hönnuði var litið til þeirra fatahönnuða sem eru með heilsteyptar fatalínur, hafa verið virkir á árunum 2009 og 2010 og þykja hafa skarað fram úr á sínu sviði.

Verðlaunin eru innblásin af starfi Indriða Guðmundssonar og því eru gæði og fagmennska lykilorð við val hönnuðar, hvort sem kemur að hugmyndum eða frágangi. Dómnefndin telur að meginmarkmið verðlaunanna sé að leggja áherslu á góða og metnaðarfulla hönnun þar sem fagurfræði, vönduð efni og frágangur er í fyrirrúmi.

Niðurstaða dómnefndarinnar var að veita Steinunni Sigurðardóttur verðlaunin í ár. Dómnefndin var sammála um að hönnun Steinunnar sé metnaðarfull og að hún hafa skarað fram úr á sviði fatahönnunar. Hennar hönnun stendur bæði fyrir gæði og fagmennsku.

Steinunn hefur átt langan og farsælan feril sem hönnuður og hefur haft veruleg áhrif á fatahönnun á Íslandi."