Alþjóðlega hönnunarsenan í Reykjavík í haust - Forsala hafin

Hönnunarráðstefnan AGI Open verður haldin 1. og 2. október í Reykjavík. Þessa tvo daga munu ríflega 20 fyrirlesarar og enn fleiri þátttakendur fjalla um notendaupplifun, letur, mörkun, forritun, bókahönnun og handbragð - svo eitthvað sé nefnt. 

Ráðstefnan er á vegum alþjóðlegu samtakanna Alliance Graphique Internationale (AGI), en hún er opin og á erindi við alla sem hafa áhuga á þróun hönnunarfagsins, sjónrænni menningu og miðlun. 

Fimmtudaginn 1. október verður glæsileg fyrirlestradagskrá í Gamla bíó og föstudaginn 2. október verða vinnustofur, innihaldsrík samtöl og umræður af ýmsu tagi í Grósku. 

Forsöluverð er 19.900 kr fyrir báða dagana á tix.is.

Alliance Graphique Internationale var stofnað 1951 í þeim tilgangi að stuðla að framgangi grafískrar hönnunar með fyrirlestrum, útgáfum og ýmiskonar fræðslu. Meðlimir þess telja nú 543 - frá 47 löndum.

AGI Open ráðstefnan er unnin í samstarfi við FÍT og Miðstöð hönnunar og arkitektúrs. Verkefnastjórn og listræn stjórn er í höndum Karlssonwilker.

Fylgstu með þróun dagskrárinnar og kynningum á fyrirlesurum á vef AGI Open og Instagram ráðstefnunnar.