Basalt arkitektar til Osaka
Íslenska arkitektastofan Basalt tekur þátt í viðburði undir heitinu Designing Wellbeeing Cities í samnorræna skálanum á heimssýningunni í Osaka í Japan 2. október næstkomandi.
Þema EXPO 2025 í Japan er Designing Future Society for Our Lives og viðburðurinn er skipulagður af arkitektúr og hönnnunarmiðstöðvum á Norðurlöndum í samstarfi við norrænu sendiráðin í Tokyo og útflutnings- og markaðsskrifstofur landanna.
Norræn byggingarlist og borgarhönnun verður rædd og sérstöku kastljósi beint að því hvernig hönnun getur stuðlað að vellíðan og auknum tengslum milli fólks.
Basalt arkitektar taka þátt í málstofu um vellíðan og hönnun með sérstaka áherslu á baðmenningu. Hvernig getur baðmenning, í bland við sögu og hefðir, nýsköpun, náttúru og arkitektúr, ýtt undir gott heilsufar og vellíðan almennings, stuðlað að frekari tengingar milli fólks og sjálfbærari lifnaðarháttum í borgum.
Íslensk-finnska arkitektastofan Rintala Eggertsson tekur einnig þátt í dagskránni. Samnorræni skálinn opnaði 13. apríl, en að honum standa Ísland, Danmörk, Finnland, Noregur og Svíþjóð. Íslenska fyrirtækið Gagarín í samstarfi við Rintala Eggertsson og Kvorning hönnuðu sýninguna í skálanum sem er opinn til 13. október.
