Fundur fólksins á laugardaginn: Húsnæðisstefna í þágu allra – hvernig tryggjum við jafnari tækifæri?

12. september 2023

Hvernig gengur ríkisstjórn og sveitarfélögum að uppfylla eigin markmið um húsnæði á viðráðanlegu verði? Hvaða úrræði eru í boði og hvaða árangri skila þau? Þarf að endurhugsa kerfið svo að tryggja megi jöfnuð? Laugardaginn 16. september verða húsnæðismál og húsnæðisstefnur lykilatriði í viðburði á vegum Fundi Fólksins. Viðburðurinn fer fram í Norræna húsinu og hefst kl. 12.00.

Í takt við sífellt aðþrengdari húsnæðismarkað hefur framboð á húsnæði á viðráðanlegu verði orðið að lykiláherslu í húsnæðisstefnum Norðurlandanna. Í opinberri stefnumótun er kveðið á um að útvega eigi nýtt húsnæði í mismunandi verð- og leiguflokkum með það að markmiði að ná til breiðari hluta íbúa, auk þess sem stuðla eigi að félagslega blönduðum hverfum. En á sama tíma virðist staða milli- og lágtekjuhópa á húsnæðismarkaði fara versnandi, bæði hérlendis og hjá norrænu nágrönnum okkar. Þá er jafnvel talað um hina „aðþrengdu miðju“ á húsnæðismarkaði, þar sem millistéttin hefur oftar en ekki hvorki efni á húsnæðisfjárfestingum né á rétt á opinberum stuðningi.

Hér munum við heyra erindi um niðurstöður rannsóknarverkefnisins „Strategic housing,“ sem rýnir í húsnæðisstefnur á Norðurlöndunum með það að markmiði að hvetja borgir til þess að þróa yfirgripsmeiri og heildstæðari húsnæðisstefnur. Anna Granath Hansson, sérfræðingur hjá Nordregio, flytur erindið, og að því loknu mun pallborð skipað sérfræðingum, fulltrúum úr borgarasamfélaginu og fulltrúum hins opinbera setja niðurstöðurnar í íslenskt samhengi. Í umræðunum munum við ekki einungis velta fyrir okkur jöfnuð hvað viðkemur framboði, heldur einnig hvað varðar gæði þess húsnæðis sem stendur til boða.

Fundarstjóri: Anna María Bogadóttir, arkitekt, eigandi Úrbanistan og dósent við Listaháskóla Íslands.

Það er Norræna húsið sem hefur umsjón með viðburðinum.

Dagsetning
12. september 2023
Höfundur
Gerður Jónsdóttir

Tögg

  • Arkitektúr