Heimsþekktir hönnuðir mæta til Reykjavíkur á AGI Open
Hönnunarheimurinn mætir til Reykjavíkur í haust þegar AGI Open fer fram dagana 1.–2. október. Yfir 30 hönnuðir hvaðanæva að úr heiminum eru staðfestir í dagskrána og fyrstu fimm nöfnin hafa nú verið kynnt til leiks. Sannkölluð vítamínsprauta fyrir íslenskt skapandi samfélag. Forsölu miða lýkur 16. ágúst.
AGI Open er alþjóðleg hönnunarráðstefna á vegum Alliance Graphique Internationale (AGI), samtaka sem leiða saman framúrskarandi hönnuði og skapandi fólk hvaðanæva að úr heiminum. Í október verður Reykjavík einn af suðupunktum alþjóðlega hönnunarheimsins þegar yfir hundrað meðlimir AGI koma hingað til lands vegna alþjóðlegrar hönnunarráðstefnu sem er haldin árlega og nú í fyrsta sinn á Íslandi.
Fyrstu fimm nöfnin hafa nú verið opinberuð: Christoph Niemann, Julia Hasting, Verònica Fuerte, Javier Jaén og Siggi Eggertsson. Öll hafa þau skapað sér sterka og afar ólíka rödd á alþjóðlegum vettvangi.
Christoph Niemann er heimsþekktur listamaður, höfundur og kvikari sem hefur skapað sér einstakan sess í alþjóðlegri sjónrænni menningu. Verk hans birtast reglulega á forsíðum The New Yorker og The New York Times Magazine og hafa verið sýnd víða um heim. Hann er jafnframt höfundur fjölda bóka og þekktur fyrir einstaka frásagnarlist og hugmyndauðgi, en heill þáttur af Netflix-þáttaröðinni Abstract: The Art of Design var helgaður verkum hans.
Skoðaðu verk Christoph Niemann
Julia Hasting er bókahönnuður og Creative Director hjá hinu heimsþekkta list- og bókaforlagi Phaidon Press, þar sem hún hefur starfað í um tvo áratugi. Hún hefur haft mikil áhrif á sjónræna ásýnd útgáfunnar og hlotið fjölda alþjóðlegra verðlauna fyrir bókahönnun sína.
Verònica Fuerte er stofnandi og Creative Director Hey Studio í Barcelona, sem hefur vakið mikla athygli á alþjóðavettvangi fyrir sterkt og auðþekkjanlegt myndmál. Hún situr jafnframt í stjórn Art Directors Club og Canva Designer Advisory Board.
Javier Jaén starfar á mörkum grafískrar hönnunar, myndlýsinga og sjónrænnar frásagnar og er þekktur fyrir leikandi og hugmyndaríkt myndmál. Verk hans hafa meðal annars birst hjá The New York Times, The New Yorker, Time og National Geographic og hann hefur unnið fyrir aðila á borð við UNESCO, Louis Vuitton, Netflix og Microsoft.
Siggi Eggertsson er íslenskur teiknari og listamaður með einstakt og auðþekkjanlegt sjónrænt tungumál þar sem litir, rúmfræði og mynstur leika stórt hlutverk. Hann býr og starfar í Berlín og kemur nú fram á Íslandi í fyrsta sinn um langa hríð.
Á erindi til allra skapandi huga
Þó að bakgrunnur flestra þeirra sem koma fram sé grafísk hönnun, er þetta fólk að fást við allt milli himins og jarðar á sviði sjónrænnar menningar og miðlunar hjá fjölbreyttri flóru auglýsingastofa, útgáfufyrirtækumog hönnunarstofa og stórfyrirtækjum á borð við Pentagram og Google. Þessi ráðstefna því sannkölluð vítamínsprauta fyrir allar skapandi greinar og ekki síður ætlað fólki sem starfar á auglýsingastofum, í myndlist, miðlun, markaðsmálum, ljósmyndun, kvikmyndum, bókaútgáfu og öðrum skapandi greinum.
AGI Open fer fram 1. - 2. október með blandaðri dagskrá fyrirlestra, samtölum, vinnustofum og tækifærum til tengslamyndunar.
AGI Open ráðstefnan er unnin í samstarfi við FÍT og Miðstöð hönnunar og arkitektúrs. Listræn stjórn er í höndum Karlssonwilker.
Ráðstefnan er öllum opin og forsölu lýkur 16. ágúst. Eftir það munu félagar FÍT og annarra aðildarfélaga Miðstöðvar hönnunar og arkitektúrs njóta sérstakra vildarkjara.
