Hildur Yeoman fagnaði nýrri sumarlínu

Hildur Yeoman fagnaði nýrri línu, Kokomo, með glæsilegu sumarpartýi í verslun sinni Yeoman á Laugavegi. Línan er innblásin af gylltum ljóma suðrænnar paradísar og miðnætursólinni á Íslandi. Hún færir þér hlýju, litadýrð og ómótstæðilegan sumaranda. 

DJ Dóra Júlía hélt uppi stuðinu ásamt því að hljómsveitin Cyber kom fram.

Hönnun Hildar hefur verið áberandi bæði innan og utan landsteinanna og er þekkt fyrir draumkennd prent, falleg snið og litadýrð. Hildur hefur unnið til fjölda verðlauna, þar með talið Fatahönnuður ársins, og hefur klætt fjöldann allan af áhugaverðum konum sem standa margar hverjar fremstar meðal jafningja á heimsvísu, m.a. Taylor Swift, Laufey, Kehlani, Ashley Graham og Björk. 

Hildur Yeoman hannar föt fyrir konur af öllum stærðum og gerðum og leggur metnað í að skapa umhverfi sem rúmar alla. Fyrirtæki Hildar Yeoman er rekið af konum og hefur kraftur kvenna verið órjúfanlegur þáttur í hönnun Hildar frá upphafi.

Hér fyrir neðan má sjá myndir frá partýinu frá Eygló Gísladóttur ljósmyndara.