Íslensk hönnun setur svip sinn á borgina

Kynningarátakið Þetta er íslensk hönnun tekur yfir Billboard- og Buzz-skjái á höfuðborgarsvæðinu dagana 5.-11. október og setur íslenska hönnun og arkitektúr í sviðsljósið. Í heila viku verður borgin sýningarrými fyrir íslenska hönnun í allri sinni breidd og fjölbreytileika sjötta árið í röð.

Markmiðið með átakinu er einfalt en mikilvægt, að auka sýnileika íslenskrar hönnunar og arkitektúrs og vekja athygli á þeim gæðum og fjölbreytileika sem hér er að finna. Átakið minnir okkur á það hversu stóran þátt hönnun á í umhverfi okkar og daglegu lífi. Hér sameinast ólíkar greinar undir einum hatti og varpa ljósi á breiddina í íslenskri hönnun og arkitektúr  en um 60 ólíkar hönnunarvörur og verk birtast á ljósaskiltum um höfuðborgina, allt frá fatahönnun, húsgögnum, húðvörum, skarti, keramik, grafískri hönnun, arkitektúr, vöruhönnun og fleira.

Þetta er íslensk hönnun er árlegt kynningarátak Miðstöðvar hönnunar og arkitektúrs í samstarfi við Billboard en Eyjólfur Pálsson í Epal átti frumkvæðið að átakinu árið 2021. Átakið hefur vakið athygli og ánægju meðal almennings í gegnum árin enda fátt fallegra en að lýsa upp borgina með íslenskri hönnun.

Anton Jónas Illugason og Simon Viðarsson hjá AJ–S hönnuðu átakið.

Hafið augun opin á ferð um borgina þessa vikuna þegar íslensk hönnun lýsir upp skammdegið.