The Nordic Report 03 - víðtæk samantekt um sjálfbæra neyslu og framleiðslu á Norðurlöndum
![](https://images.prismic.io/midstod-honnunar-og-arkitekturs/b4dd11f8-c0e6-42ee-b36b-c26a166dd89d_Nordic+Report+03+.jpg?auto=compress,format&rect=0,0,2000,1333&w=1620&h=1080)
SUSTAINORDIC, samnorrænn vettvangur sem beinir sjónum að sjálfbærri neyslu og framleiðslu á Norðurlöndunum í samræmi við heimsmarkmið Sameinuðu þjóðanna, fagnar útgáfu skýrslunnar The Nordic Report 03 sem varpar ljósi á framúrskarandi norræn dæmi um sjálfbæra framleiðslu og neyslu og hvetur um leið til alþjóðlegrar þróunar á þessu sviði.
Norðurlöndin eru leiðandi þegar kemur að sjálfbærri þróun og tilgangur vettvangsins er að safna saman og dreifa góðum fyrirmyndum og dæmum um sjálfbærar leiðir á alþjóða vettvangi.
Útgáfu The Nordic Report 03 verður fagnað þann 17. nóvember næstkomandi með rafrænum hætti á heimasíðu Sustainordic.
Í fyrri skýrslunum voru góð verkefni og aðferðir frá Norðurlöndunum dregin fram í dagsljósið en í þriðju skýrslunni er markmiðið að veita lesandanum dýpri innsýn og skilning á málefninu með dæmum og viðtölum. Í tólf köflum er fjallað um allt frá breyttri hugmyndafræði frá línulegs til hringrásar hagkerfisins, samfélags án rusls og flutninga og matvæli framtíðar.
![](https://images.prismic.io/midstod-honnunar-og-arkitekturs/39cd81c1-0f8a-4d85-bdd2-edcb16f45471_Nordic+report+3.jpg?auto=compress,format)
Markmið Sustainordic er að hafa jákvæð og hvetjandi áhrif á framþróun í norrænni og alþjóðlegri stefnumótun á sviði sjálfbærni. Skýrslan varpar ljósi á vandamálin og fjallar um lausnir til að veita innblástur og hvetja lesendur til aðgerða.
Umfjöllunarefnin og viðmælendur frá Íslandi í The Nordic Report 03 eru Gunnar Sveinn Magnússon, sérfræðingur í sjálfbærri þróun hjá Íslandsbanka, Hrund Gunnsteinsdóttir, framkvæmdastjóri Festu, miðstöðvar um sjálfbæra þróun, vöruhönnuðirnir Birta Rós Brynjólfsdóttir og Hrefna Sigurðardóttir frá Fléttu hönnunarstúdíó og Dr. Kristinn R. Þórisson, prófessor í tölvunarfræði við HR og stjórnandi Vitvélastofnunar Íslands.
Rafrænn útgáfufögnuður fer fram á heimasíðu verkefnisins Sustainordic þann 17. nóvember næstkomandi kl. 12 (+GMT).
Þar verða panelumræður þar sem Hrund Gunnsteinsdóttir, framkvæmdastjóri Festu, miðstöðvar um sjálfbæra þróun verður í góðum hópi úr viðmælendahópi skýrslunnar.
Ef við værum meðvitaðri um að nota rökhugsun og skapandi hugsun meira og með markvissari hætti, gætum aukið samstarf og miðlað hugmyndum þvert á geira og sérgreinar, held ég að okkur tækist betur að skapa sterkari framtíðarsýn fyrir atvinnulífið.
Að Sustainordic koma auk Miðstöðvar hönnunar og arkitektúrs, ArkDes og Form/Design Center frá Svíþjóð, Design Forum Finland, DOGA frá Noregi og Dansk Design Center. Verkefnið er styrkt af Norrænu ráðherranefndinni.
Sustainordic hefur nú gefið út 3 skýrslur þar sem er að finna viðtöl og umfjöllun um ólík verkefni landanna sem öll eiga það sameiginlegt að vinna með sjálfbærni að leiðarljósi.
Skýrslurnar má nálgast á skrifstofu Miðstöðvar hönnunar og arkitektúrs í Grósku, Bjargargötu 1, 102 Reykjavík eða senda tölvupóst á info@honnunarmidstod.is.