Þykjó á Helsinki Design Week

7. september 2023

Helsinki Design Week hefst á morgun og tekur íslenska hönnunarteymið Þykjó þátt, annarsvegar í Design Diplomacy í sendiráði Íslands í Helsinki á morgun og hinsvegar með vinnustofu fyrir börn á HDW Children´s Design Week um helgina.

Sigríður Sunna Reynisdóttir listrænn stjórnandi ÞYKJÓ ræðir við Jonathan Ingberg stofnanda byhinders í íslenska sendiráðinu í Helsinki á morgun, 8. september á Design Diplomacy. Konseptið hefur einnig verið hluti af dagskrá HönnunarMars í gegnum árin og eru viðburðir í sendiráðabústöðum þar sem tveir hönnuðir frá sitthvoru landinu eiga í samtali út frá sérsniðnum spurningaspjöldum, notuð til að hefja hönnunarmiðaða umræðu og kryfja til mergjar innblástur, daglega rútínu og vinnuferli hönnuða.

Sigríður Sunna Reynisdóttir listrænn stjórnandi ÞYKJÓ og Jonathan Ingberg stofnandi byhinders ræða saman á Design Diplomacy.

Laugardaginn 9. september verður svo Þykjó vinnustofa á HDW Children´s Design Week í Cable Factory menningarmiðstöðinni þar sem verður leidd smiðja fyrir börn með þemanu borgarskipulag í tilefni af 10 ára afmæli SuoMu stofnunnarinnar.

Viðhvetjum sem flesta i Helsinki til að kíkja við!

Um Þykjó:
ÞYKJÓ er þverfaglegt hönnunarverkefni fyrir börn og fjölskyldur þeirra á sviði textíl-, leikfanga- og upplifunarhönnunar. ÞYKJÓ er hópur hönnuða með fjölbreyttan bakgrunn sem samnýta ólíka sérþekkingu í teymisvinnu sinni. Innan vébanda ÞYKJÓ eru arkitekt, fatahönnuður og klæðskeri, leikmynda- og búningahönnuður. Hópurinn vinnur einnig náið með listafólki, vísindafólki og síðast en ekki síst - með börnum. 

Dagsetning
7. september 2023
Höfundur
Álfrún Pálsdóttir

Tögg

  • Greinar
  • Helsinki Design Week