1 Granary mætir á DesignTalks - eruð þið tilbúin að tengjast?

1 Granary er menntamiðað fjölmiðlaumhverfi sem er í fararbroddi alþjóðlega tískuheimsins. Markmið vettvangsins er að efla næstu kynslóð skapandi fólks og stuðla að jákvæðum breytingum í tískuiðnaðinum. Með alþjóðlegu neti yfir 50 hönnunarskóla notar 1 Granary umfjöllun, viðburði, ráðningar og ráðgjöf í vörumerkjauppbyggingu til að brúa bilið milli upprennandi hönnuða og þeirra reynslumeiri og skapa þannig tækifæri fyrir næstu kynslóð skapandi huga.

Með starfi sínu er 1 Granary að umbreyta iðnaðinum og hlutverki hönnuða innan hans. Olya Kuryshchuk er stofnandi og ritstjóri 1 Granary og er ein af fremstu sérfræðingum í greininni í að uppgötva hæfileikaríkt fólk, að hjálpa hönnuðum að vaxa og í að byggja upp vörumerki. Hún er einnig lektor við Central Saint Martins og sinnir  reglulega dómnefndarstörfum í alþjóðlegum hönnunarsamkeppnum.

Ritstjóri vettvangsins er Jorinde Croese, sem leiðir ritstjórn á prent-, stafrænu- og vefefni. Hún er einnig ritstjóri hjá tímaritinu System og starfaði áður sem yfirritstjóri (Senior Features Editor) hjá i-D. Verk hennar beinast að nýjum hæfileikum í tísku, menntun og þeim kerfum sem móta iðnaðinn, með sérstakan áhuga á raunveruleikanum sem fylgir því að byggja upp skapandi starfsemi í dag.

Nú þegar hafa frábærir fyrirlesarar verið staðfestir á DesignTalks: Stefan Sagmeister, Dorte Mandrup, Hjalti Karlsson, Kristjana S Williams, hönnunarteymið 1+1+1 og RANRA.

Miðasala er í fullum gangi á tix.is. Hönnunarráðstefnan DesignTalks er eitthvað sem þú vilt ekki missa af. Tryggðu þér miða í dag!