Enn bætist í flóru fyrirlesara: RANRA verður á DesignTalks

Við kynnum til leiks á DesignTalks í ár, RANRA, hönnunarstúdíó sem samanstendur af Arnari Má Jónssyni og Luke Stevens. Arnar og Luke stofnuðu RANRA fyrir tæpum tíu árum og hafa náð eftirtekarverðum árangri.

Merkið sameinar tæknilega frammistöðu með náttúrulegum efnum og á rætur í djúpri tengingu við landslag, veður og handverk. RANRA leggur áherslu á tímalausa hönnun, sjálfbærni og vandaða smíði og skapar flíkur sem eru gerðar til að endast og þróast með notandanum. Arnar og Luke reka einnig Nattura Studio, þar sem þeir vinna með alþjóðlegum vörumerkjum að þróun í hönnun og sinna listrænni stjórn. Þar má nefna samstarf þeirra við Salomon sem vakið hefur sérstaka athygli á alþjóða vettvangi.

Arnar er hönnuður og listrænn stjórnandi. Í verkum sínum kannar hann samspil handverks, náttúru og samtíma hönnunar og sækir oft innblástur í íslenskt landslag og hefðbundna fatagerð. 

Luke er hönnuður og rannsakandi með aðsetur í París og annar stofnenda RANRA. Verkefni hans spanna hönnun, listræna stjórn og akademíska rannsóknarvinnu, þar sem hann skoðar nýjungar í efnum, nýjar leiðir í framleiðslutækni og kerfishugsun í tískugeiranum.

Það verður spennandi að heyra hvað þeir hafa að segja. Miðasala er í fullum gangi á tix.is. Tryggðu þér miða á innblástursbombu HönnunarMars!