Bláa lónið bakhjarl Miðstöðvar hönnunar og arkitektúrs
Bláa Lónið og Miðstöð hönnunar og arkitektúrs hafa undirritað samstarfssamning til þriggja ára. Bláa Lónið verður bakhjarl Miðstöðvar hönnunar og arkitektúrs og mun einnig koma að ýmsum samstarfsviðburðum er tengjast nýsköpun og samfélagsverkefnum á næstu árum. Forsvarsmenn undirrituðu samninginn í húsakynnum Miðstöðvar hönnunar og arkitektúrs í Grósku.
Bláa Lónið hefur stutt Miðstöð hönnunar og arkitektúrs frá 2012 og tekið þátt í að byggja miðstöðina upp sem hreyfiafl og vettvang fyrir fjölbreytta starfsemi, viðburði og verkefni. Fyrirtækið hefur auk þess tekið virkan þátt í HönnunarMars frá upphafi með samstarfi og styrkjum.
„Í okkar augum er hönnun drifkraftur fyrir ábyrga nýsköpun og félagslega þróun og höfum við þess vegna lagt áherslu á hönnun og hönnunarhugsun frá upphafi,” segir Sigurður Þorsteinsson, forstöðumaður brands, hönnunar og þróunarverkefna hjá Bláa Lóninu.
Grímur Sæmundsen, forstjóri Bláa Lónsins segir hönnun vera lykilatriði í allri starfsemi Bláa Lónsins. „Arkitektúr og hönnun hafa frá upphafi verið leiðarstef í uppbyggingu Bláa Lónsins og það er okkur þess vegna sérstakt ánægjuefni að eiga áfram í gjöfulu samstarfi við Miðstöð hönnunar og arkitektúrs.”
„Það er mikið gleðiefni að efla enn frekar samstarfið við Bláa Lónið, sem hefur verið samstarfs- og styrktaraðili til margra ára, enda er fyrirtækið í fremstu röð þegar kemur að íslenskri hönnun og hönnunarhugsun. Við hlökkum til áframhaldandi samstarfs og tækifærum til að efla í sameiningu vettvang íslenskrar hönnunar og arkitektúrs með viðburðum og verkefnum á okkar vegum,” segir Halla Helgadóttir, framkvæmdastjóri Miðstöðvar hönnunar og arkitektúrs.
