Hver á efnið? Líflegar umræður um gervigreind og höfundarétt á Tölum um
Gervigreindin er komin til að vera, en hver á það sem hún skapar og hvað verður um réttindi þeirra sem standa að baki hugmyndunum? Þessum stóru spurningum og mörgum fleiri var velt upp á Tölum um hönnun og arkitektúr í Grósku á miðvikudag.
Það var að venju notaleg morgunstemning í Grósku þar sem gestir komu saman yfir kaffibolla og bakkelsi áður en dagskráin hófst. Að þessu sinni var viðfangsefnið bæði brýnt og flókið enda hefur ör þróun gervigreindar vakið fjölmargar spurningar um eignarhald, frumleika og verðmæti skapandi starfa. Hvar liggja mörkin milli mannlegrar sköpunar og tækninnar og hvernig tryggjum við að réttindi skapandi fólks verði virt í síbreytilegum heimi?
Á svið stigu Hjálmar Gíslason, stofnandi og stjórnandi GRID, Hrafn Gunnarsson, sköpunarstjóri og stofnandi Brandenburg, Halldór Eiríksson arkitekt og formaður SAMARK og Anna Tumadóttir, framkvæmdastjóri Creative Commons. Þau nálguðust viðfangsefnið út frá ólíkum sjónarhornum og vörpuðu ljósi á þær áskoranir og tækifæri sem fylgja aukinni notkun gervigreindar í skapandi greinum.
Í kjölfarið fóru fram pallborðsumræður þar sem Rán Tryggvadóttir höfundaréttarsérfræðingur bættist í hópinn. Lóa Björk Björnsdóttir, dagskrárgerðarkona á Rás 1, stýrði umræðunum þar sem tekist var á við stórar spurningar um framtíð sköpunar, höfundarétt og ábyrgð í heimi þar sem tækninni fleygir fram.
Umræðuefnið er sannarlega þess eðlis að ekki er hægt að svara öllum spurningum á einni morgunstund. Það er þó einmitt tilgangurinn með Tölum um, að skapa vettvang fyrir samtal, ólík sjónarmið og nýjar hugmyndir. Miðstöð hönnunar og arkitektúrs þakkar öllum sem tóku þátt og gestum kærlega fyrir komuna og áhugaverðan morgun!
Hér að neðan verður hægt að horfa á upptöku af viðburðinum.
Miðstöð hönnunar og arkitektúrs stendur fyrir mánaðarlegum viðburðum undir yfirskriftinni Tölum um hönnun og arkitektúr í samstarfi við Vísindagarða Háskóla Íslands, Grósku og Bláa Lónið.
