Opið kall eftir sýningum í Norræna húsinu á HönnunarMars

Norræna húsið í Reykjavík auglýsir eftir tillögum að verkefnum og viðburðum frá arkitektum og hönnuðum úr skapandi greinum sem verður hluti af dagskrá HönnunarMars 2027.

INNSÝN er þema HönnunarMars 2027 og kallað er eftir tillögum í takt við þemað, sem varpa ljósi á hvernig hið byggða umhverfi hefur áhrif á vellíðan okkar, daglegt líf og tilfinningu fyrir því að tilheyra. Hvað gerir rými aðlaðandi og þýðingarmikið? Og hvað getum við lært af hugmyndunum, efniviðnum og ferlinu sem liggja að baki því umhverfi sem við mótum?

Leitað er eftir fjölbreyttum verkefnum á sviði arkitektúrs, borgarskipulags, landslagsarkitektúrs og/eða hönnunar. Verkefnin geta meðal annars verið í formi smærri sýninga, innsetninga, fyrirlestra, vinnustofa eða tilraunakenndra verkefna.

Umsóknum skal fylgja:

• Stutt lýsing á hugmyndinni og hvernig hún tengist áherslum opna kallsins.
• Upplýsingar um umsækjanda eða þann hóp sem stendur að verkefninu.
• Tillaga að formi, umfangi og tímalengd verkefnisins.
• Myndefni eða skissur til stuðnings hugmyndinni, ef við á.
• Upplýsingar um rýmisþörf og tæknilegar kröfur, ef við á.

Umsóknir skal senda á info@honnunarmars.is.