Nýr stjórnandi HönnunarMars er Þura Stína Kristleifsdóttir
Þura Stína Kristleifsdóttir hefur tekið við starfi stjórnanda HönnunarMars.
Hún mun leiða framkvæmd HönnunarMars í samstarfi við Klöru Rún Ragnarsdóttur, dagskrárstjóra hátíðarinnar og teymi Miðstöðvar hönnunar og arkitektúrs. Þura Stína mun einnig taka þátt í fjölbreytilegum verkefnum MH&A á Íslandi og erlendis.
Þura Stína er grafískur hönnuður, framleiðandi og listrænn stjórnandi. Hún lauk BA-gráðu í grafískri hönnun frá Listaháskóla Íslands og MA-gráðu í Visual Design and Integrated Marketing Communication frá NABA í Mílanó. Hún hefur starfað sjálfstætt við hönnun, leikstjórn, framleiðslu og listræna stjórnun frá 2016 og starfað sem grafískur hönnuður meðal annars hjá auglýsingastofunni Brandenburg og í markaðsteymi Nova.
„Við erum mjög spennt að fá Þuru Stínu til að leiða HönnunarMars inn í nýja tíma og bætast við sem öflugur liðsmaður í teymi Miðstöðvar hönnunar og arkitektúrs. Hún hefur mikla og verðmæta reynslu sem hönnuður, framleiðandi og listrænn stjórnandi og hefur auk þess mjög góða þekkingu á hátíðinni sem framleiðandi DesignTalks til margra ára og þátttakandi. Það verður spennandi að taka þátt í þróun HönnunarMars undir stjórn Þuru Stínu sem tekur við góðu búi frá fyrri stjórnanda hátíðarinnar,“ segir Kristján Schram, stjórnarformaður HönnunarMars.
Þura Stína hefur unnið að HönnunarMars í ólíkum hlutverkum, meðal annars sem upplifunarhönnuður, verkefnastjóri og sýnandi. Hún hefur verið framleiðandi DesignTalks ráðstefnunnar í Hörpu frá árinu 2022.
Síðast starfaði hún sem kynningar- og markaðsstjóri fyrir Listahátíð í Reykjavík þar sem hún bar ábyrgð á markaðs- og kynningarmálum.
„HönnunarMars er hátíð hönnuða og arkitekta en líka okkar allra. Hún er vettvangur þar sem við komum saman til að fagna íslenskri hönnun, deila þekkingu, takast á við nýjar hugmyndir og skapa ný tengsl. Það eru spennandi tækifæri fram undan og ég er mjög spennt að takast á við nýjar áskoranir og halda áfram að þróa hátíðina í samstarfi við samfélag íslenskra hönnuða og arkitekta og öflugt teymi Miðstöðvar hönnunar og arkitektúrs,“ segir Þura Stína, nýr stjórnandi HönnunarMars.
