Sýning norræna skálans fær önnur verðlaun
Sýning norræna skálans á heimssýningunni EXPO 2025 í Osaka var nýlega verðlaunuð sem besta heildarsýning og -upplifun á Iconic verðlaununum sem veitt eru árlega í Þýskalandi. Þetta eru önnur verðlaun sem sýningin hlýtur í haust. Íslenska hönnunarstofan Gagarín, ásamt dönsku hönnunarstofunni Kvorning og norsk-íslensku arkitektastofunni Rintala Eggertsson, hönnuðu sýninguna í skálanum.
„Verðlaunin koma ánægjulega á óvart. Expo-verkefnið var bæði skemmtilegt og krefjandi, sérstaklega þar sem viðskiptavinurinn var í raun fimm þjóðir og umfang skálans öllu minna en hjá stóru þjóðunum,“ segir Kristín Eva Ólafsdóttir framkvæmdastjóri Gagarín.
Iconic verðlaunin eru tileinkuð framúrskarandi arkitektúr, heildar innanhúshönnun og -upplifun og frumlegum verkum á hverju ári. Aðalverðlaun hátíðarinnar fengu að þessu sinni Lina Ghotmeh arkitekt, sem hélt fyrirlestur á DesignTalks í Hörpu síðasta vor, Lucas Muñoz Muñoz innanhússhönnuður, barnaspítalinn í Zürich, Mariam Issoufou arkitekt og námsver í tækniháskólanum í Braunschweig.
Nýlega fékk sýningin í norræna skálanum gullverðlaun í flokknum Best Exhibit / Display á World Expolympics fyrir framúrskarandi útfærslur í nýsköpun og upplifunarhönnun á Heimssýningunni í Japan. Heimssýningin opnaði í maí sl. og lauk 13. október en þar voru settar upp samtals 193 sýningar í þjóðarskálum. Sýningin í norræna skálanum snýst um lífið á Norðurlöndunum með áherslu á gildi, nútímasamfélög, vitundarvakningu og eilífðarsamband okkar við náttúruna. Miðpunktur sýningarinnar er listaverk úr 700 pappírsörkum og ljósi sem svífur í rýminu og stórt lifandi 20 mínútna myndverk The Circle of Trust sem fjallar um árstíðirnar fjórar og lífið á Norðurlöndunum. Upplifunin dýpkar enn með hljóðverki eftir íslensku tónlistarmennina Sindra Má Sigfússon (Sin Fang) og Kjartan Holm.
