The Radical Act of Bathing together á Taste of Iceland í New York

Vel var mætt á viðburðinn The Radical Act of Bathing Together sem Miðstöð hönnunar og arkitektúrs stóð fyrir í Scandinavia House í New York föstudaginn 2. október. Viðburðurinn var hluti af hátíðinni Taste of Iceland sem haldinn er af Íslandsstofu og Inspired by Iceland, og beindi sjónum að baðmenningu, samfélagslegu hlutverki arkitektúrs og opinberum rýmum.

Viðburðurinn var hluti af kynningu á Íslenska skálanum og sýningunni SOAK: Rituals of Collective Belonging - samfélag í bleyti, framlagi Íslands á Feneyjatvíæringnum í arkitektúr árið 2027.

Í fyrirlestrum og pallborðsumræðum var íslensk baðmenning og félagsleg hlið hennar sett í alþjóðlegt samhengi. Svanhildur Hólm Valsdóttir sendiherra Íslands í Washington, opnaði viðburðinn og fundarstjórn var í höndum Höllu Helgadóttur, framkvæmdastjóri Miðstöðvar hönnunar og arkitektúrs. Fyrirlesarar voru Marcos Zotes, arkitekt, meðeigandi Basalt arkitekta og sýningarstjóri íslenska skálans og Christie Pearson, arkitekt, listamaður og höfundur bókarinnar The Architecture of Bathing. Að loknum erindum voru pallborðsumræður sem Andri Snær Magnason, rithöfundur, stýrði en í þeim tóku þátt ásamt Marcos og Christie, Miodrag Mitrašinović, arkitekt, borgarfræðingur, höfundur og prófessor í arkitektúr og borgarfræðum við Parsons School of Design, Allyson McDavid dósent í sjónrænni menningu og efnisheimum fornaldar við Parsons School of Design og Kristín Eva Ólafsdóttir, grafískur hönnuður og framkvæmdastjóri Gagarín.

Mikilll áhugi var á viðburðinum og komu gestir víðsvegar að.

Með þátttökunni í Taste of Iceland gafst tækifæri til að kynna hugmyndir SOAK fyrir gestum í New York og opna samtal um vatn sem félagslegt rými.