Þorsteinn Gunnarsson nýr heiðursfélagi í Arkitektafélagi Íslands

Þorsteinn Gunnarsson lauk námi í arkitektúr frá Listaakademíuna í Kaupmannahöfn árið 1966 og síðan framhaldsnámi í byggingafornleifafræði við Franska skólann í Aþenu, Grikklandi. Þorsteinn er þannig fyrsti íslenski arkitektinn með sérmenntun í endurgerð gamalla bygginga.

Strax að námi loknu vann Þorsteinn bæði að byggingarannsóknum á vegum Þjóðminjasafns Dana í Kaupmannahöfn ásamt því að vinna á teiknistofu hinna einkar vönduðu arkitekta, Inger og Johannes Exner.

Þorsteinn rak síðan eigin teiknistofu eftir að hann flutti aftur til Íslands og hefur komið að öllum helstu endurbyggingarverkefnum á Íslandi á sínum starfsferli, s.s. endurgerð Viðeyjarstofu og Viðeyjarkirkju, Bessastaða og Bessastaðakirkju ásamt Garðari Halldórssyni húsameistara ríkisins, Nesstofu, Hóladómkirkju og Dómkirkjunnar í Reykjavík. Hann er einnig arkitekt að Borgarleikhúsinu ásamt Guðmundi Kr. Guðmundssyni og Ólafi Sigurðssyni.

Þorsteinn er jafnframt höfundur fjölmargra fræðirita og bóka, þ. á m. um húsin í Viðey og Hóladómkirkjur til forna. Þá ritstýrði hann ritröðinni Kirkjur Íslands og árið 2022 kom út bók hans Nesstofa við Seltjörn – saga hússins - endurreisn og byggingalist, sem hlaut tilnefningu til Íslensku bókmenntaverðlaunanna.

Það er jafnframt svo merkilegt við Þorstein að hann hefur átt sér annan starfsferil samhliða arkitektúrnum sem er ekki síður glæstur. Áður en hann hefur nám í arkitektúr er hann í námi við Leiklistarskóla Þjóðleikhússins. Þegar hann er svo aftur fluttur til Íslands stundar hann nám við leiklistarskóla  Leikfélags Reykjavíkur og lýkur lokaprófi þar 1968. Hann verður fastráðinn hjá Leikfélagi Reykjavíkur 1971 og leikhússtjóri þess 1980-83. Hann hefur leikið í fjölmörgum leikritum, sjónvarpsseríum og kvikmyndum og hefur skipað sér sess sem einn ástsælasti leikari þjóðarinnar.

Þorsteinn Gunnarson er handhafi hinnar íslensku fálkaorðu og 2020 hlaut hann jafnframt viðurkenningu Minjastofnunar Íslands. Í ár minnumst við þess að 50 ár eru liðin frá Evrópska húsverndarárinu 1975 og stofnun Húsafriðunarsjóðs á Íslandi. Fyrir tilstilli fræðimanna á borð við Þorstein hefur virðing fyrir byggingalistaarfi þjóðarinnar vaxið.

Stjórn AÍ þótti því löngu tímabært að gera Þorsteinn Gunnarsson að heiðursfélaga Arkitektafélags Íslands og fagnar því að félagsfólk reyndist einróma sammála.

Til hamingju Þorsteinn!