Verðmætasköpun í Grósku – vel sóttur viðburður

Sjónum var beint að verðmætasköpun og útflutningi sem byggir á hönnun og arkitektúr í fyrirlestraröðinni „Tölum um hönnun og arkitektúr“ sem fer fram mánaðarlega í Grósku. Þar komu saman stjórnendur úr leiðandi fyrirtækjum og sérfræðingar úr nýsköpunarumhverfinu og deildu reynslu sinni af því hvernig hönnun og arkitektúr geta verið lykilþættir í nýsköpun og viðskiptalegum árangri fyrirtækja.

Sigurður Þorsteinsson, framkvæmdastjóri brand, markaðsmál og viðskiptaþróun hjá Bláa lóninu, Fannar Páll Aðalsteinsson, markaðsstjóri hjá 66°Norður, Páll Einarsson, listrænn stjórnandi hjá Rafnari og Agnar Tr. Lemacks, ráðgjafi og eigandi ATON sem hönnuðu brandið Good Good héldu erindi. Guðrún Inga Ingólfsdóttir, formaður stjórnar Tækniþróunarsjóðs og Hrönn Greipsdóttir, forstjóri Nýsköpunarsjóðsins Kríu tóku þátt í samræðum á eftir sem Bergur Finnbogason, listrænn stjórnandi hjá CCP stýrði.

Viðburðurinn var haldinn samhliða fyrstu úthlutun Hönnunarsjóðs á árinu, þar sem veittir voru styrkir til verkefna sem efla þekkingu, atvinnusköpun og alþjóðlega kynningu á íslenskri hönnun.

Að vanda var margt um manninn og góð stemning meðal gesta. Við þökkum kærlega fyrir komuna og þátttökuna.

Mikilvægt er að halda áfram að efla og viðhalda öflugu samtali um hönnun og arkitektúr, sem gegna lykilhlutverki í þróun skapandi greina og verðmætasköpun til framtíðar.

Fyrirlestraröðin Tölum um hönnun og arkitektúr er unnin í samstarfi við Grósku, Vísindagarða og Bláa Lónið.