DesignTalks 2023 leitar svara við þessari spurningu með áhrifamiklum erindum frá fjölbreyttum hópi hönnuða, arkitekta og listamanna sem nálgast núið og framtíðina á skapandi hátt.

Heilandi hönnun, hönnun sem byggir á samstarfi við bakteríur, nýsköpun hráefna, hönnun sem tekst á við erfiðar aðstæður á stríðssvæðum, róttækur landslagsarkitektúr með villta náttúru í forgrunni, þverfagleg hönnun með áherslu á leikgleði og samveru, valdeflandi hönnun sem vekur von og ögrandi arkitektúr er meðal þess sem tekið verður fyrir.

DesignTalks varpar ljósi á mikilvægi hönnunar og arkitektúrs í samfélagslegum og hnattrænum breytingum og tekst á við áskoranir og tækifæri líðandi stundar. Við lifum á elleftu stundu og ákall eftir sjálfbærum lausnum er hávært. Í skugga mistækra tilrauna til aðgerða í loftslagsmálum, pólitísks óstöðugleika og eftirmála heimsfaraldurs, spyrjum við: hvað nú?

Hlín Helga, listrænn stjórnandi DesignTalks

Núið er snúið en svörin eru uppfull af von. Þau bera þess glöggt merki hversu mikill máttur skapandi hugsunar er, líka þegar á reynir.

Deginum verður skipt upp í fjóra hluta sem taka á spurningu dagsins með ólíkum hætti.

Frammi fyrir hamfarahlýnun og stríðsástandi spyrjum við hvernig hægt sé að láta reyna á sköpunarkraftinn núna? Við skoðum dæmi um hönnuði sem tekst á við erfiðar aðstæður á stríðshrjáðum svæðum, listamann sem nálgast brýnar loftslagsáskoranir og könnum eðli sköpunarkraftsins sjálfs. Hvernig getum við hvatt til hugrekkis og vakið von með hönnun? Hvernig fáum við fólk til liðs við móður náttúru?

Fleira og fleira fólk á í erfiðleikum með að sinna grunnþörfunum, hefur skert aðgengi að mat og skjóli og náttúruauðlindir fara þverrandi. Við spyrjum: hvað nú? Felst lausnin í að umbreyta úreltum kerfum? Nýsköpun hráefna? Hvernig á að byggja og endurbyggja fyrir alla? Og framleiða föt og vörur á siðferðilegan og sjálfbæran hátt?

Heimurinn er að jafna sig eftir heimsfaraldur sem hafði varanleg áhrif á heilsu margra og einmanaleika en mögulega einnig á viðhorf til þess sem raunverulega skiptir máli. Í þriðja hluta er fjallað um heilsu og annars konar auð. Hvað nú? Hönnun heilandi umhverfis? Borgarlandslag þar sem náttúran gegnir lykilhlutverki?  Hvernig hönnum við af virðingu, fyrir jafnrétti, þátttöku og inngildingu fyrir öll? Hvert er gildi hönnunarhugsunar við endurhönnun lífsins?  

Fjórði og síðasti hluti dagsins fjallar um framtíðina, sem er óvissari og opnari en nokkru sinni fyrr. Við spyrjum hver ætli að skapa hana? Skoðum frásagnaraðferðir þvert á miðla sem eitt öflugasta verkfæri hins skapandi huga og tengsl náttúru, tækni og vitsmuna. Getur hönnun hjálpað okkur að njóta góðs af framförum í vísindum og tækni? Eigum við að vinna meira með bakteríum og örverum? Taka stjórn á sögunni, framtíðinni? Eða halla okkur aftur og láta gervigreindina gera það?

Meðal þeirra  sem koma fram á DesignTalks 2023 eru; Paula Antonelli, yfirsýningarstjóri hönnunar og arkitektúrs á MoMA, Pavel Vrzheshch, einn af stofnendum og listrænn stjórnandi úkraínsku auglýsingastofunnar Banda,Odile Decq, arkitekt og borgarskipulagsfræðingur, Natsai Audrey Chieza, lífhönnnuður, framkvæmdarstjóri og stofnandi Faber Futures, Paul Veenstra, landslagsarkitekt og annars stofnandi LOLA landscape Architects, Sigríður Sunna Reynisdóttir, listrænn stjórnandi og stofnandi ÞYKJÓ, Michael Hendrix, alþjóðlegan hönnunarstjóra og meðeiganda IDEO og Thomas Pausz, hönnuður, listamaður og rannasakandi.

Fylgstu með þegar við höldum áfram að kynna spennandi fyrirlesara sem taka þátt í DesignTalks 2023 á næstu dögum, degi fullum af innblæstri og áhugaverðum samtölum um áskorun og lausnir líðandi stundar.

DesignTalks 2023 er m.a. styrkt af Nordic Talks.

Ekki missa af stærsta og skemmtilegasta hönnunarviðburði ársins. 

DesignTalks 2023 - Paola Antonelli, yfirsýningarstjóri arkitektúrs og hönnunar hjá MoMA, framleiðandi MoMA Salon R&D og stofnandi Design Emergency

DesignTalks 2023 - Odile Decq, arkitekt og borgarskipulagsfræðingur 

DesignTalks 2023 - Pavel Vrzheshch, stofnandi og listrænn stjórnandi úkraínsku auglýsingastofunnar Banda

DesignTalks 2023 - Sigríður Sunna Reynisdóttir, stofnandi og listrænn stjórnandi ÞYKJÓ

DesignTalks 2023 - Peter Veenstra, landslagsarkitekt og einn stofnandi LOLA Landscape Architects

DesignTalks 2023 - Natsai Audrey Chieza, stofnandi og framkvæmdarstjóri Faber Futures

DesignTalks 2023 - Michael Hendrix, alþjóðlegur hönnunarstjóri og meðeigandi IDEO

DesignTalks 2023 - Thomas Pausz, hönnuður, listamaður og rannsakandi

Hvað nú? DesignTalks 2023

Deila

Tögg