Hönnunarverðlaun Íslands varpa ljósi á mikilvægi og gæði hönnunar og arkitektúrs á Íslandi með áherslu á áhrif þeirra á lífsgæði, verðmætasköpun og sjálfbærni fyrir samfélagið allt.

Miðstöð hönnunar og arkitektúrs tók nýlega þátt í sameiginlegum norrænum viðburði í Japan þar sem norræn hönnun og arkitektúr voru kynnt með áherslu á baðmenningu í samstarfi við Íslandsstofu og Sendiráð Íslands í Japan. Viðburðurinn var skipulagður í samstarfi við systurstofnanir Miðstöðvar hönnunar og arkitektúrs á Norðurlöndunum og var hluti af dagskrá Norðurlandanna á heimssýningunni Expo 2025 Osaka.

Fischersund talar til allra skilningarvita í gegnum ilm, tónlist og myndlist. Frá stofnun Fischersunds hefur skynheimurinn stækkað og styrkst um leið og verkum og vörum hefur fjölgað. Fischersund er tilnefnt til Hönnunarverðlauna Íslands 2025 í flokknum verk.

Lavaforming er framsækin rannsókn og sýn s.ap arkitekta þar sem ógnvekjandi náttúruöflum er breytt í verðmæt og sjálfbær byggingarefni. Lavaforming er tilnefnt til Hönnunarverðlauna Íslands 2025 í flokknum verk.

Stöng - (Endur)túlkun er hönnun og yfirbygging yfir uppgröft fornminja frá landnámstíð í Þjórsárdal eftir SP(R)INT STUDIO. Stöng - (Endur)túlkun er tilnefnd til Hönnunarverðlauna Íslands 2025 í flokknum staður.

Elliðaárstöð er nýr áfangastaður með ólíkum rýmum og fjölbreytilegri upplifun í Elliðaárdal, hönnuð af Tertu þverfaglegu hönnunarteymi í samstarfi við Orkuveituna. Elliðaárstöð er tilnefnd til Hönnunarverðlauna Íslands 2025 í flokknum staður.

Elja er fjallahjól hannað og framleitt af Lauf Cycles. Elja er fulldempað fjallahjól sem sameinar með einstökum hætti eiginleika fjalla-, keppnis- og borgarhjóls. Elja er tilnefnt til Hönnunarverðlauna Íslands 2025 í flokknum vara.

Oase eru vatnsílát hönnuð af Johanna Seelemann vöruhönnuði fyrir MAKK safnið í Köln en form ílátanna, sem eru úr terracotta leir, eru sótt til eldsneytistanka. Oase vatnsílátin eru tilnefnd til Hönnunarverðlauna Íslands 2025 í flokknum vara.

Gunnar Hansson (1925 – 1989) var einn af þeim arkitektum sem ruddi nýjum áherslum leið inn í húsbyggingar og hverfisskipulag hérlendis. Hafa nokkur verka hans verið valin í úrvalsflokk þess sem hæst ber í íslenskum arkitektúr á seinni hluta 20. aldar.

Plan B og Slökkvistöðin býður ykkur á opnun sýningarinnar Scenes in Icelandic Deserta eftir arkitektana Joyce Hsiang og Bimal Mendis sunnudaginn 19. október klukkan 14:00.

Sýning norræna skálans á heimssýningunni EXPO 2025 í Osaka var nýlega verðlaunuð sem besta heildarsýning og -upplifun á Iconic verðlaununum sem veitt eru árlega í Þýskalandi. Þetta eru önnur verðlaun sem sýningin hlýtur í haust. Íslenska hönnunarstofan Gagarín, ásamt dönsku hönnunarstofunni Kvorning og norsk-íslensku arkitektastofunni Rintala Eggertsson, hönnuðu sýninguna í skálanum.

Í tilefni þess að á næsta ári eru 35 ár síðan Ísland var fyrst þjóða til að viðurkenna sjálfstæði Lýðveldisins Eistlands ætlar Skipulagssvið Tallinn-borga að efna til nemendasamkeppni um tímabundið hönnunarinngrip á "Íslandstorginu" í Tallinn.