STJAKAR, sem opnaði hjá HAKK Gallery um helgina, er ný samsýning þar sem hönnuðir, arkitektar, handverks- og myndlistafólk, bæði innlent og erlent hannar ákveðinn hlut með frjálsri aðferð og efnisnotkun.

Verslunin Rammagerðin hefur staðið fyrir þeirri skemmtilegu hefð síðan 2020 að fá hönnuði til að hanna sína eigin útgáfu af jólakettinum. Jólaköttur ársins er lentur en að þessu sinni var hönnunin í höndum mæðginanna Aldísar Einarsdóttur leirkerasmiðs og Davíðs Georgs Gunnarssonar arkitekts.

Bláa Lónið og Miðstöð hönnunar og arkitektúrs hafa undirritað samstarfssamning til þriggja ára. Bláa Lónið verður bakhjarl Miðstöðvar hönnunar og arkitektúrs og mun einnig koma að ýmsum samstarfsviðburðum er tengjast nýsköpun og samfélagsverkefnum á næstu árum. Forsvarsmenn undirrituðu samninginn í húsakynnum Miðstöðvar hönnunar og arkitektúrs í Grósku.

Miðstöð hönnunar og arkitektúrs stendur fyrir opnum fyrirlestrum í vetur um áhugaverð málefni sem snúa að hönnun og arkitektúr. Næsti fyrirlestur verður 19. nóvember kl. 9 í Grósku þegar við tölum um samkeppnir og hvort þær skila bestu niðurstöðunni.

Hönnunarverðlaun Íslands 2025 voru veitt við hátíðlega athöfn í Grósku þann 6. nóvember.  Fjallahjólið Elja er vara ársins, Elliðaárstöð er staður ársins og Fischersund verk ársins. Þá hlaut Albína Thordarson arkitekt Heiðursverðlaun og Náttúruverndarstofnun viðurkenningu fyrir bestu fjárfestingu í hönnun.

Elliðaárstöð er nýr áfangastaður með ólíkum rýmum og fjölbreytilegri upplifun í Elliðaárdal, hönnuð af Tertu þverfaglegu hönnunarteymi í samstarfi við Landslag.

Albína Thordarson arkitekt hlýtur heiðursverðlaun Hönnunarverðlauna Íslands 2025 fyrir framlag sitt til byggingarlistar en hún hefur tryggt sér sess sem einn fremsti arkitekt Íslendinga. Hún hefur með störfum sínum rutt brautina fyrir nýjar kynslóðir arkitekta. Ævistarf Albínu Thordarson er merkilegur vitnisburður um gildi arkitektúrs sem þjónar fólki, samfélagi og menningu til framtíðar.

Náttúruverndarstofnun hlýtur viðurkenningu fyrir bestu fjárfestingu í hönnun á Hönnunarverðlaunum Íslands 2025 fyrir framúrskarandi nálgun við uppbyggingu gestastofa með hönnun og arkitektúr að leiðarljósi.

Hönnunarverðlaun Íslands 2025 verða afhent í Grósku í dag 6. nóvember. Verðlaun eru veitt í þremur flokkum; Vara, Staður og Verk ársins. Að auki verða Heiðursverðlaun Hönnunarverðlauna Íslands og viðurkenning fyrir bestu fjárfestingu í hönnun veitt.

Hönnunarverðlaun Íslands varpa ljósi á mikilvægi og gæði hönnunar og arkitektúrs á Íslandi með áherslu á áhrif þeirra á lífsgæði, verðmætasköpun og sjálfbærni fyrir samfélagið allt.

Miðstöð hönnunar og arkitektúrs tók nýlega þátt í sameiginlegum norrænum viðburði í Japan þar sem norræn hönnun og arkitektúr voru kynnt með áherslu á baðmenningu í samstarfi við Íslandsstofu og Sendiráð Íslands í Japan. Viðburðurinn var skipulagður í samstarfi við systurstofnanir Miðstöðvar hönnunar og arkitektúrs á Norðurlöndunum og var hluti af dagskrá Norðurlandanna á heimssýningunni Expo 2025 Osaka.

Fischersund talar til allra skilningarvita í gegnum ilm, tónlist og myndlist. Frá stofnun Fischersunds hefur skynheimurinn stækkað og styrkst um leið og verkum og vörum hefur fjölgað. Fischersund er tilnefnt til Hönnunarverðlauna Íslands 2025 í flokknum verk.