HA / Fréttir

Sýningin Eftir á að hyggja eftir Katrínu Maríu Káradóttur, prófessor í fatahönnun við Listaháskóla Íslands, opnar í Beitunni á Akranesi laugardaginn 3. október. Þar lítur Katrín um öxl og dregur fram afrakstur rannsókna sinna á sjávarleðri, um leið og hún leitar nýrra leiða til framtíðar.

Miðstöð hönnunar og arkitektúrs tekur þátt í Taste of Iceland í New York í október með viðburðinum The Radical Act of Bathing Together. Þar verður íslensk baðmenning sett í alþjóðlegt samhengi og sjónum beint að því hvernig vatn, arkitektúr og sameiginlegir siðir geta skapað rými fyrir samveru, tengsl og tilheyrandi samfélag. Viðburðurinn fer fram í Scandinavia House föstudaginn 2. október.

HönnunarMars er hátíð sköpunar, hugmynda og nýrrar sýnar. Þar mætast hönnuðir, arkitektar og fyrirtæki sem hugsa stórt, ögra viðteknum hugmyndum og feta nýjar slóðir. Hvað er að gerast? Er eitthvað að breytast? Hvað er að springa út?

Þura Stína Kristleifsdóttir hefur tekið við starfi stjórnanda HönnunarMars. Hún mun leiða framkvæmd HönnunarMars í samstarfi við Klöru Rún Ragnarsdóttur, dagskrárstjóra hátíðarinnar og teymi Miðstöðvar hönnunar og arkitektúrs. Þura Stína mun einnig taka þátt í fjölbreytilegum verkefnum MH&A á Íslandi og erlendis.

DesignTalks er opnunarviðburður HönnunarMars sem hefur um árabil verið vettvangur fyrir alþjóðlegt og íslenskt samtal um framsækna hönnun, arkitektúr og samfélag. Þar koma saman hönnuðir, arkitektar og skapandi hugsuðir saman og  deila nýjum hugmyndum, verkefnum, lausnum og reynslu. Miðstöð hönnunar og arkitektúrs hefur skipað listrænt teymi framúrskarandi fagfólks úr ólíkum greinum hönnunar sem vinnur að mótun þema, innihalds og skapandi stefnu DesignTalks 2027.

Fyrsti fyrirlestur vetrarins í fyrirlestraröðinni Tölum um hönnun og arkitektúr fór fram við góðar undirtektir í Grósku þar sem margt var um manninn. Þar var horft til framtíðar og rætt um þær stóru breytingar sem eru framundan og ekki síður hvernig við getum sjálf tekið þátt í að móta það sem tekur við. Það var ánægjulegt að sjá hversu margir mættu til að hefja daginn á samtali um framtíðina.

„Ég ætlaði varla að trúa mínum eigin augum þegar ég sá að allar þessar stórstjörnur úr hönnunar heiminum væru að koma hingað til Íslands,“ segir Rósa Hrund Kristjánsdóttir, sköpunarstjóri. Tilefnið er AGI Open, alþjóðleg hönnunarráðstefna sem fer fram í Reykjavík 1. og 2. október og leiðir saman einstakan hóp fólks sem hefur haft mótandi áhrif á grafíska hönnun og sjónræna menningu síðustu áratuga.

Christian Bason hefur um árabil unnið á mörkum hönnunar, stjórnunar og samfélagsbreytinga. Hann kemur til Íslands og heldur MasterClass á vegum Miðstöðvar hönnunar og arkitektúrs í Grósku 16. september. Í viðtali við Miðstöð hönnunar og arkitektúrs ræðir hann meðal annars námskeiðið þar sem hann býður stjórnendum og fagfólki í skapandi greinum, arkitektum, hönnuðum og öðrum sem eru að vinna í umhverfi sem er að breytast mjög hratt, upp á áhugaverða aðferðafræði sem er byggð á bókinni hans Expand.

Dýpi tók þátt í Helsinki Design Week í Finnlandi í vikunni, bæði sem hluti af hönnunar sýningunni Habitare Pro og viðburðinum Design Diplomacy í íslenska sendiráðinu í Helsinki. Mað þátttökunni gafst Dýpi tækifæri til að kynna sig á alþjóðlegum vettvangi og skapa ný tengsl milli íslensks og finnsks hönnunarsamfélags.

Hönnuður í fókus í septembermánuði er Sóldís Finnbogadóttir, grafískur hönnuður hjá Studio Dumbar. Þegar Sóldís Finnbogadóttir hélt til Rotterdam sumarið 2021 var planið að dvelja þar í þrjá mánuði í starfsnámi hjá Studio Dumbar. Fimm árum síðar er hún þar enn. Hún segir frá lífinu í Rotterdam, verkefnum sínum og AGI Open sem fer fram hér í Reykjavík í október.

Tveir tengdir viðburðir á sviði arkitektúrs og byggingarsögu verða í Ásmundarsal í september – sýning á skólaverkefnum Sigvalda Thordarson arkitekts og útgáfuboð tveggja nýrra bóka.